کٹھوعہ کے ہیرانگر میں مشتبہ نقل و حرکت کے بعد تلاشی آپریشن جاری

عظمیٰ ویب ڈیسک
سرینگر/جموں و کشمیر کے ضلع کٹھوعہ کے ہیرانگر علاقے میں پیر کو اُس وقت سکیورٹی فورسز نے تلاشی کارروائی شروع کی جب ایک شہری نے تین مشتبہ افراد کو جنگلاتی علاقے کے قریب دیکھا۔حکام کے مطابق، مشتبہ نقل و حرکت ہیرا نگر سلادی نامی علاقے میں دیکھی گئی جس کے بعد مقامی پولیس، فوج اور نیم فوجی دستوں نے مشترکہ طور پر علاقے کو محاصرے میں لے کر بڑے پیمانے پر تلاشی آپریشن شروع کر دیا۔
ذرائع نے بتایا کہ سکیورٹی ایجنسیوں کو الرٹ کر دیا گیا، اور پورے علاقے میں نگرانی سخت کر دی گئی ہے، خاص طور پر جموں-پٹھانکوٹ قومی شاہراہ پر چوکسی میں اضافہ کیا گیا ہے۔
علاقے میں ڈرونز اور جدید آلات کی مدد سے مشتبہ افراد کا سراغ لگانے کی کوششیں جاری ہیں۔ فی الوقت کسی گرفتاری یا تصادم کی اطلاع موصول نہیں ہوئی ہے تاہم حکام کا کہنا ہے کہ سرچ آپریشن احتیاطی طور پر جاری رہے گا ۔
ایک سینئر پولیس افسر نے بتایا کہ شہریوں سے اپیل کی گئی ہے کہ وہ کسی بھی مشتبہ سرگرمی کی فوری اطلاع قریبی پولیس اسٹیشن کو دیں تاکہ امن و امان کو برقرار رکھا جا سکے۔دفاعی ذرائع کے مطابق سیکیورٹی فورسز نے علاقے میں داخل ہونے اور نکلنے کے تمام راستے سیل کر دیے ہیں اور تلاشی مہم اس وقت تک جاری رہے گی جب تک کہ صورتحال مکمل طور پر واضح نہ ہو جائے۔