ڈاکٹرستیَش وِمل ”خلعتِ بلخی“ایوارڈ سے سرفراز

عظمیٰ ویب ڈیسک
سرینگر/معروف ادیب، شاعر اور مفکر ڈاکٹر ستیَش وِمل کو “خلعتِ بلخی” (بلخی میموریل ایوارڈ) 2025 سے نوازا گیا۔ یہ سالانہ اعزاز نوسوز پیپلز فاؤنڈیشن کی جانب سے پکھرپورہ میں دیا گیا۔ یہ ایوارڈ ہر سال ایک ایسی شخصیت کو عطا کیا جاتا ہے جس نے صوفی۔رِشی مطالعات یا فکری روایتوں کے میدان میں نمایاں خدمات انجام دی ہوں۔
یہ اعزاز مشہور صوفی بزرگ سلطان علی عالی بلخیؒ کے نام پر جاری کیا گیا ہے، جن کا مزار پکھرپورہ میں واقع ہے۔ ڈاکٹر ستیَش وِمل کو یہ ایوارڈ ان کی صوفی۔رِشی مطالعات میں عظیم خدمات اور روحانی روایتوں پر تحقیقاتی کام کے اعتراف میں پیش کیا گیا۔
پیپلز فاؤنڈیشن کے صدر جی ایم نوسوز نے کہا کہ جیوری نے متفقہ طور پر ڈاکٹر ستیَش وِمل کو اس ایوارڈ کے لیے منتخب کیا، کیونکہ ان کی علمی اور ادبی خدمات بے مثال اور گراں قدر ہیں۔
تقریبِ ایوارڈ میں وادیٔ کشمیر کے مختلف حصوں سے آئے ہوئے ممتاز علما، دانشوران، معزز شہری اور مذہبی شخصیات نے شرکت کی۔