عظمیٰ ویب ڈیسک
سرینگر/جموں و کشمیر حکومت نے پیر کے روز انکشاف کیا کہ2024 کے اسمبلی انتخابات کے انعقاد پر 155 کروڑ روپے خرچ کیے گئے۔
یم ایل اے کپواڑہ میر محمد فیاض کی جانب سے پیش کردہ کٹ موشن کے جواب میں وزیر برائے الیکشن ڈیپارٹمنٹ جاوید احمد ڈارنے اسمبلی کو بتایا کہ 2014 کے اسمبلی انتخابات کے انعقاد پر150 کروڑ روپے خرچ ہوئے تھے۔ انہوں نے مزید کہا کہ حالیہ انتخابات سے متعلق مالی واجبات کی ادائیگی کے لیے فنڈز جاری کرنے کا معاملہ حکومت کے زیر غور ہے۔
وزیر نے کہا، حالیہ اسمبلی انتخابات کے انعقاد پر 155 کروڑ روپے خرچ ہوئے۔ واجبات کی ادائیگی کے لیے فنڈز جاری کرنے کا معاملہ فعال غور و خوض میں ہے۔
یہ انتخابات گزشتہ سال ستمبر اور اکتوبر میں تین مراحل میں منعقد ہوئے تھے۔ ان انتخابات میں نیشنل کانفرنس سب سے بڑی جماعت کے طور پر ابھری، جس نے42 نشستیں حاصل کیں، جبکہ اس کی اتحادی جماعت کانگریس نے 6 نشستوں پر کامیابی حاصل کی۔
بی جے پی نے 29 نشستیں جیتیں، جبکہ پیپلز ڈیموکریٹک پارٹی (پی ڈی پی) نے 3 نشستیں حاصل کیں۔ جموں و کشمیر پیپلز کانفرنس ، کمیونسٹ پارٹی آف انڈیا (مارکسسٹ) اور عام آدمی پارٹی نے ایک، ایک نشست پر کامیابی حاصل کی، جبکہ آزاد امیدواروں نے 7 نشستیںجیتیں۔
2024 کے اسمبلی انتخابات پر 155 کروڑ روپے خرچ ہوئے: جموں و کشمیر حکومت
