ریاستی حیثیت کی بحالی عوامی خدمات کی راہ میں حائل رکاوٹیں دور کرے گی: ڈاکٹر فاروق عبداللہ

عظمیٰ ویب ڈیسک
سری نگر/نیشنل کانفرنس کے صدر اور سابق وزیر اعلیٰ جموں و کشمیر ڈاکٹر فاروق عبداللہ نے کہا ہے کہ موجودہ حکومت ریاست کی تعمیر و ترقی اور عوام کی فلاح و بہبود کے لیے پوری تن دہی سے کام کر رہی ہے اور پارٹی اپنے منشور میں کیے گئے وعدوں کو پورا کرنے کے لیے تمام وسائل بروئے کار لا رہی ہے۔
ان خیالات کا اظہار انہوں نے پیر کے روز پارٹی ہیڈکوارٹر پر کشمیر صوبے کے مختلف اضلاع سے آئے ہوئے پارٹی لیڈران، ضلعی صدور، عہدیداران اور کارکنوں کے ساتھ تبادلہ خیالات کے دوران کیا۔
ڈاکٹر فاروق نے کہا کہ حکومت عوامی مسائل سے بخوبی واقف ہے اور اُن کے ازالے کے لیے سنجیدہ کوششیں جاری ہیں۔ انہوں نے کہا کہ نیشنل کانفرنس اقتدار میں ہو یا باہر، عوامی خدمت ہماری ترجیح رہی ہے۔ یہ وہ روایت ہے جو ہمیں ہمارے بانی قائد شیرِ کشمیر شیخ محمد عبداللہ نے دی ہے۔
انہوں نے پارٹی کارکنوں کو ہدایت دی کہ وہ آنے والے پنچایتی اور بلدیاتی انتخابات کی تیاریاں ابھی سے شروع کریں، کیونکہ یہ ادارے عوامی مسائل کو مقامی سطح پر حل کرنے میں اہم کردار ادا کرتے ہیں۔انہوں نے کہا کہ نوجوان، باصلاحیت، تعلیم یافتہ، دیانتدار اور عوامی اعتماد رکھنے والے نمائندوں کو آگے لایا جائے تاکہ جمہوری اداروں کو مضبوط بنایا جا سکے۔
ڈاکٹر فاروق عبداللہ نے مرکز سے اپیل کی کہ وہ جموں و کشمیر کا ریاستی درجہ فوری طور پر بحال کرے تاکہ یہاں کی حکومت بغیر کسی رکاوٹ کے عوامی خدمت کے کام انجام دے سکے۔انہوں نے کارکنوں کو تاکید کی کہ وہ عوامی مسائل کو ہر فورم پر اجاگر کریں اور ان کے حل کے لیے اپنا اثر و رسوخ استعمال کریں۔
اختتام پر ڈاکٹر فاروق عبداللہ نے کارکنوں سے کہا کہ وہ اپنے اپنے علاقوں کے عوامی نمائندوں، بالخصوص ممبرانِ اسمبلی کے ساتھ مسلسل رابطے میں رہیں اور عوامی مسائل ان کے سامنے اجاگر کرتے رہیں تاکہ ان کا بروقت حل ممکن ہو سکے۔