سری نگر/محکمہ موسمیات کی پیش گوئی کے مطابق جموں وکشمیر میں اگلے چار دنوں کے دوران کئی علاقوں میں ہلکی سے درمیانی درجے کی بارشوں کا امکان ہے اور اس دوران جموں صوبے کے کچھ علاقوں میں درمیانی سے بھاری بارش متوقع ہے۔
متعلقہ محکمے کے ایک ترجمان نے بتایا کہ جموں وکشمیر میں 30 اگست سے 2 ستمبر تک کئی مقامات پر ہلکی سے درمیانی درجے کی بارشوں کا امکان ہے اور اس دوران جموں صوبے کے کچھ علاقوں میں درمیانی سے بھاری بارشیں متوقع ہیں۔
انہوں نے کہا کہ بعد میں 3 سے 7 ستمبر تک موسم عام طور پر گرم اور مرطوب رہنے کا امکان ہے تاہم اس دوران کہیں کہیں گرج چمک کے ساتھ مختصر مرحلے کی بارشیں متوقع ہیں۔
محکمے نے اپنی ایڈوائزری میں کہا کہ جموں صوبے کے کچھ علاقوں میں 30 اگست کی صبح سے یکم ستمبر کی رات گئے تک درمیانی سے بھاری بارشیں متوقع ہیں۔
انہوں نے کہا کہ اس دوران کہیں کہیں سیلابی ریلے، لینڈ سلائیڈنگ اور پتھر کھسک آنے کے بھی خطرات ہیں۔
ایڈوائزری میں لوگوں سے کہا گیا ہے کہ وہ دریائوں، ندی نالوں اور کمزور تعمیراتی ڈھانچوں کے نزدیک جانے سے اجتناب کریں۔
ادھر وادی میں جمعہ کو موسم عام طور پر خشک رہا۔