عظمیٰ ویب ڈیسک
جموں// وزیر اعلیٰ عمر عبداللہ نے سول سیکریٹریٹ میں ایک اجلاس کی صدارت کرتے ہوئے محکمہ باغبانی، پارکس اور گارڈنز کی کارکردگی کا جائزہ لیا اور اس شعبے کی ترقی کے لئے نئے منصوبوں اور حکمت عملیوں پر غور کیا۔
وزیر اعلیٰ نے اجلاس کے دوران کہا کہ کشمیر کو جلد ہی ریلوے کے ذریعے ملک کے دیگر حصوں سے جوڑ دیا جائے گا، جس سے وادی کے پھولوں کی صنعت میں بے پناہ امکانات پیدا ہوں گے۔ انہوں نے زور دیا کہ اس کنیکٹیویٹی کا استعمال کشمیر کے پھولوں کو نہ صرف ملک بلکہ عالمی منڈیوں میں متعارف کرانے کے لئے ہونا چاہیے۔
انہوں نے کہا، “ترقی پسند کاشتکاروں اور دیگر متعلقہ افراد کو اس عمل میں شامل کر کے ہم اس شعبے کی مکمل صلاحیت کا فائدہ اٹھا سکتے ہیں”۔
عمر عبداللہ نے سرینگر کے مشہور ٹیولپ گارڈن کی مزید ترقی کے لئے ایئرپورٹ روڈ پر ٹیولپس لگانے اور سیاحوں کو راغب کرنے کے لئے تشہیری مہم شروع کرنے کی ہدایت بھی دی۔
کمشنر سیکریٹری شیخ فیاض احمد نے محکمے کی پیش رفت پر ایک تفصیلی پریزنٹیشن پیش کی، جس میں مختلف کامیابیوں اور جاری منصوبوں پر روشنی ڈالی گئی۔ انہوں نے ٹیولپ شو 2024 کا ذکر کیا، جس میں 72 اقسام کے 17 لاکھ ٹیولپس لگائے گئے اور مارچ 2024 میں 4.46 لاکھ سیاحوں نے اس کا دورہ کیا
اجلاس میں فلوریکلچر کے مختلف اہم منصوبوں پر بات چیت ہوئی، جن میں سناسر میں ٹیولپ گارڈن کی تعمیر، آرائشی چیری درختوں کے باغات (ساکورا) کا قیام، اور پہلگام میں گلاب اور پونی کے باغات شامل ہیں۔
اس کے علاوہ، چھ تاریخی مغل باغات کو یونیسکو کے عالمی ورثہ کی فہرست میں شامل کرنے کی جاری کوششوں پر بھی تبادلہ خیال کیا گیا۔
مزید، جموں و کشمیر کے پارکس اور باغات کو جدید بنانے کے لئے مختلف منصوبے زیر غور آئے، جن میں باغِ بہو گارڈن کی اپ گریڈیشن، جموں میں بوئر کیمپ گارڈن کی تعمیر، اودھمپور میں کرسینتھیمم پلانٹیشن، بادام واری کی اپ گریڈیشن، اور دارا شکوہ گارڈن کا قیام شامل ہیں۔
وزیر اعلیٰ نے گارڈنز کی دیکھ بھال کے لئے جدید ٹیکنالوجی اور مشینری کے استعمال پر زور دیا تاکہ وسائل کا بہتر استعمال کیا جا سکے اور آمدنی میں اضافہ ہو۔
انہوں نے کہا کہ ایسے منصوبے ترجیح دیے جائیں جو نہ صرف سیاحت کو فروغ دیں بلکہ خطے کے قدرتی ورثے کو بھی محفوظ رکھیں۔
اجلاس میں وزیر اعلیٰ کے مشیر ناصر اسلم وانی، چیف سیکریٹری دھیرج گپتا، کمشنر سیکریٹری شیخ فیاض احمد، اور کشمیر و جموں کے فلوریکلچر ڈائریکٹرز سمیت دیگر متعلقہ عہدیداران نے شرکت کی۔
