عظمیٰ ویب ڈیسک

اننت ناگ// اننت ناگ پولیس نے منشیات کی روک تھام کے خلاف اہم کارروائی کرتے ہوئے ایک بدنام زمانہ منشیات فروش غلام حسن بندرو عرف قاسم، ولد ولی محمد، ساکن سوٹکی پورہ کی 50 لاکھ روپے مالیت کی رہائشی جائیداد ضبط کر لی۔
پولیس ترجمان نے بتایا کہ یہ کارروائی پولیس سٹیشن سریگفوارہ کے ذریعے عمل میں لائی گئی، جو منشیات کے خاتمے کے لیے جاری مہم کا حصہ ہے۔
ملزم، جو ایک عادی مجرم ہے، منشیات کی سمگلنگ میں ملوث رہا ہے اور اس کے خلاف این ڈی پی ایس ایکٹ کے تحت متعدد کیسز درج ہیں، جن میں پولیس اسٹیشن سریگفوارہ میں درج ایف آئی آر 04/2014 اور 74/2021 شامل ہیں۔
ترجمان نے بتایا کہ یہ کیسز سمگلر کی غیر قانونی سرگرمیوں کے ذریعے معاشرتی بہبود کو نقصان پہنچانے کی کوششوں کو اجاگر کرتے ہیں۔
پولیس کی جانب سے جائیداد کی ضبطی ان لوگوں کے لیے سخت پیغام ہے جو غیر قانونی منشیات کے کاروبار میں ملوث ہیں کہ ایسی سرگرمیاں برداشت نہیں کی جائیں گی۔
اننت ناگ پولیس منشیات کے اسمگلنگ نیٹ ورکس کو ان کے مالی وسائل اور آپریشنل بیسز کو نشانہ بنا کر ختم کرنے کے لیے پرعزم ہے۔
پولیس نے اس بات کا اعادہ کیا ہے کہ وہ منشیات کے خلاف اپنی مہم کو جاری رکھے گی اور عوام سے اپیل کی ہے کہ وہ منشیات کی اسمگلنگ یا اس سے متعلق کسی بھی سرگرمی کی اطلاع دیں۔
عوام کا تعاون کمیونٹی کے تحفظ اور منشیات سے پاک معاشرے کے قیام کے لیے ضروری ہے۔