عظمیٰ ویب ڈیسک
سرینگر/جموں و کشمیر حکومت نے ہفتہ کو جموں و کشمیر اور لداخ ہائی کورٹ کو مطلع کیا کہ محبوس رکن اسمبلی مہراج ملک کو راجیہ سبھا انتخابات میں ووٹ ڈالنے کے قابل بنانے کے لیے ضروری انتظامات مکمل کر لیے گئے ہیں۔جسٹس راجیش سیکری کی عدالت میں پیش ہوتے ہوئے سینئر ایڈوکیٹ سنیل سیٹھی اور سینئر ایڈیشنل ایڈووکیٹ جنرل مونیکا کوہلی نےبتایا کہ حکومت نے پہلے ہی ڈاک ووٹ مجاز اتھارٹی کو بھیج دیا ہے تاکہ 24 اکتوبر 2025 کو ہونے والے راجیہ سبھا انتخابات میں مہراج ملک کی شرکت کو ممکن بنایا جا سکے۔
یہ بیان اُس درخواست کی سماعت کے دوران سامنے آیا جو ملک نے دائر کی تھی، جس میں انہیں ووٹ ڈالنے اور آنے والے اسمبلی اجلاس میں شرکت کی اجازت دینے کی استدعا کی گئی تھی۔ درخواست گزاروں کی جانب سے سینئر ایڈوکیٹ راہول پنت اور وکلاء کی ایک ٹیم نے دونوں مطالبات پر فوری غور کی اپیل کی، تاہم سرکاری وکیل نے واضح کیا کہ ووٹنگ سے متعلقہ پہلو پر پہلے ہی اقدامات کیے جا چکے ہیں۔
تاہم عدالت نے نوٹ کیا کہ حکومت کا جواب ابھی تک ریکارڈ پر نہیں آیا ہے۔ عدالت نے رجسٹری کو ہدایت دی کہ جواب کو ریکارڈ پر لایا جائے اور معاملہ 27 اکتوبر 2025 کو دوبارہ سماعت کے لیے مقرر کیا، تاکہ اسمبلی اجلاس میں ملک کی شرکت سے متعلق دوسرے مطالبے پر غور کیا جا سکے، جو 23 اکتوبر سے شروع ہونے والا ہے۔عدالت نے حکومت کو یہ بھی ہدایت دی کہ محبوس کو قانون کے مطابق ووٹ ڈالنے کی اجازت دی جائے۔
