عظمیٰ نیوز سروس

سری نگر// جموں و کشمیر کے لیفٹیننٹ گورنر منوج سنہا نے پیر کو کہا کہ پولیس نے ملی ٹینسی، امن و امان اور جدیدیت کے چیلنجوں سے کامیابی کے ساتھ نمٹا ہے اور پولیس اپنے داخلی سلامتی کے انتظام کے ذریعے اس بات کو یقینی بنا رہی ہے کہ ایک عام شہری بلا خوف زندگی گزارسکیں۔
ایل جی سنہا نے یہاں ڈل جھیل کے کنارے واقع ایس کے آئی سی سی میں جشن ڈل تقریب کے اختتام پر ایک اجتماع سے خطاب کرتے ہوئے کہا کہ داخلی سلامتی کی وجہ سے کشمیر کے لوگ پرامن ماحول میں جی رہے ہیں۔
انہوں نے کہا، “جموں و کشمیر پولیس نے ملی ٹینسی، امن و امان اور جدیدیت کے چیلنجوں سے کامیابی کے ساتھ نمٹا ہے”۔
انہوں نے مزید کہا کہ پولیس سویک ایکشن پروگراموں کے ذریعے جن میں پیڈل فار پیس اور جشن ڈل شامل ہیں، لوگوں نے کھیلوں سے متعلق کئی تقریبات میں حصہ لیا۔
ایل جی نے کہا کہ جشن ڈل پروگرام میں 700 سے زائد کھلاڑیوں نے حصہ لیا۔ “ڈل جھیل صرف ایک جھیل نہیں ہے بلکہ لوگوں کا فخر ہے۔ جن لوگوں نے اس کی صفائی میں حصہ لیا ہے وہ اپنا کام جاری رکھیں تاکہ جھیل کو بنیادی طور پر صاف کیا جا سکے۔ یوتھ سروسز سپورٹس ڈیپارٹمنٹ نے قابل ستائش کام کیا ہے “۔
اُنہوں نے مزید کہا کہ گزشتہ سال، جموں و کشمیر میں 60 لاکھ نوجوانوں نے مختلف کھیل سرگرمیوں میں حصہ لیا۔ شاید ہی کوئی ایسا ضلع ہو جہاں کھیلوں کی سرگرمیاں یا کوئی بڑا ٹورنامنٹ ہر روز منعقد نہ ہوتا ہو۔
ایل جی نے کہا کہ انتظامیہ نے جموں و کشمیر میں کھیلوں کے بنیادی ڈھانچے کو اپ گریڈ کیا ہے۔ دو بین الاقوامی سٹیڈیم جموں و کشمیر کے علاقوں میں بنائے گئے ہیں۔ ہر ضلع اور پنچایت میں والی بال اور فٹ بال کے میدانوں کے علاوہ کثیر مقصدی کھیلوں کی سہولیات موجود ہیں“۔
انہوں نے مزید کہا کہ سری نگر کو ایک نئی شناخت ملی ہے۔