امرناتھ یاترا سے قبل جموں میں سیکورٹی سخت

عظمیٰ ویب ڈیسک
سرینگر/امرناتھ یاترا کے آغاز سے قبل جموں پولیس نے شہر بھر میں متعدد چیک پوائنٹس قائم کر کے سیکورٹی انتظامات کو مزید سخت کر دیا ہے اور روزانہ کی بنیاد پر انسداد تخریب کاری چیکنگ شروع کر دی ہے۔
38 روزہ سالانہ یاترا 3 جولائی سے شروع ہونے والی ہے، جو دو راستوں سے کی جائے گی ایک 48 کلومیٹر طویل روایتی پہلگام روٹ (ضلع اننت ناگ) اور دوسرا 14 کلومیٹر مختصر مگر دشوار بالتل روٹ (ضلع گاندربل) جو 3,880 میٹر بلند امرناتھ غار مندر کی طرف لے جاتے ہیں۔یاترا کے آغاز سے ایک دن قبل، یاتریوں کا پہلا قافلہ جموں کے بھگوتی نگر بیس کیمپ سے کشمیر روانہ ہوگا۔
ایک پولیس ترجمان نے کہا، امرناتھ یاترا کے پیش نظر، جموں پولیس نے ضلع بھر میں متعدد اسٹریٹجک مقامات پر مشترکہ ناکے قائم کر کے سیکورٹی کو مضبوط بنایا ہے۔انہوں نے بتایا کہ یہ ناکے نیم فوجی دستوں کے ساتھ مل کر قائم کیے گئے ہیں تاکہ یاتریوں کو محفوظ اور پرسکون سفر فراہم کیا جا سکے۔
یہ ناکے قومی شاہراہوں، شہر کے مضافات اور بھگوتی نگر بیس کیمپ کی جانب جانے والے راستوں پر چوبیس گھنٹے فعال رہیں گے۔پولیس، سی آئی ایس ایف، سی آر پی ایف، آئی ٹی بی پی اور دیگر سیکیورٹی ایجنسیوں کے اہلکار سخت تلاشی، نگرانی اور شناخت کی تصدیق جیسے اقدامات میں مصروف ہیں۔
ترجمان نے بتایا کہ سینئر پولیس افسران ناکوں پر جاری کارروائیوں کی ذاتی طور پر نگرانی کر رہے ہیں تاکہ چوکسی، پیشہ ورانہ رویے اور عوامی سہولت کو یقینی بنایا جا سکے۔انھوں نے کہا ناکوں پر تعینات ٹیموں کو سخت چیکنگ اور یاتریوں و عام شہریوں سے شائستہ برتاؤ کے درمیان توازن قائم رکھنے کی ہدایت دی گئی ہے۔
ترجمان کے مطابق، خاص توجہ گاڑیوں کی جانچ، شناخت کی تصدیق اور مشکوک حرکات کی نشاندہی پر دی جا رہی ہے، جس میں تکنیکی سہولتوں اور بھیڑ والے مقامات پر فیشل ریکگنیشن سسٹم (FRS) کا استعمال کیا جا رہا ہے۔انہوں نے کہا، ہوٹلوں، گیسٹ ہاؤسز اور قیام گاہوں پر بھی اچانک چھاپہ مار چیکنگ کی ہدایات جاری کی گئی ہیں۔
پولیس نے عوام اور یاتریوں سے اپیل کی ہے کہ وہ ناکوں پر تعینات اہلکاروں سے تعاون کریں، اپنی شناختی دستاویزات ساتھ رکھیں اور کسی بھی مشکوک سرگرمی کی فوری اطلاع دیں۔ ترجمان نے کہا، مقدس یاترا کے دوران امن و امان برقرار رکھنے میں عوامی تعاون نہایت اہم ہے۔
دوسری جانب، سینئر سپرنٹنڈنٹ آف پولیس (ایس ایس پی) جموں، جوگیندر سنگھ نے ایس پی جی گروپ کمانڈر اور دیگر سینئر پولیس افسران کے ہمراہ یاترا روٹ پر سیکورٹی صورتحال کا تفصیلی جائزہ لیا، جو نگروٹہ کے ٹریفک چیک پوسٹ سے سالورہ (جموں-سرینگر قومی شاہراہ) تک تھا۔
ترجمان نے بتایا کہ اعلیٰ سطحی ٹیم نے تعیناتی کے مقامات کا معائنہ کیا اور وہاں تعینات افسران سے ملاقات کی۔انہوں نے کہا، افسران کو موجودہ خطرات کے منظرنامے اور ڈیوٹی کے دوران اپنائے جانے والے طریقہ کار (SOPs) سے آگاہ کرنے کے لیے ایک تفصیلی بریفنگ سیشن بھی منعقد کیا گیا۔
ترجمان نے مزید کہا کہ خاص طور پر ایکسپریس وے کی تعمیراتی جگہوں جیسے حساس علاقوں میں روزانہ تخریب کاری سے بچاؤ کی چیکنگ پر زور دیا گیا۔ایس ایس پی نے تمام سیکورٹی اداروں کے درمیان تعاون اور کسی بھی ممکنہ صورتحال کے لیے بروقت ردعمل کی اہمیت پر زور دیا، اور اس بات کا اعادہ کیا کہ انتظامیہ یاتریوں کو محفوظ گزرگاہ فراہم کرنے کے لیے پرعزم ہے۔