بھتہ خوری میں ملوث بدنام زمانہ ملزم گرفتار :پولیس

عظمیٰ ویب ڈیسک
سری نگر/سری نگر پولیس نے بھتہ خوری میں ملوث نوجوان کی گرفتاری عمل میں لا کر اس کو سلاخوں کے پیچھے دھکیل دیا۔
پولیس کے ایک ترجمان نے بتایا کہ طفیل احمد بیدار ولد محمد اکبر بیدار ساکن بڈی پورہ کیموہ کولگام نے 10جنوری کو پولیس پوسٹ باغیاث میں تحریری شکایت درج کی کہ وہ علاج ومعالجہ کی خاطر مریض کے ہمراہ شیرین باغ سری نگر آیا ۔
انہوں نے کہاکہ رات کے وقت دوائیاں خریدنے کی خاطر وہ بازار گیا جس دوران نامعلوم شخص نے اس کو زبردستی گاڑی میں بٹھا کر آٹھ ہزار روپیہ کی رقم لوٹ لی۔
شکایت موصول ہونے کے بعد پولیس نے معاملے کی نسبت دفعہ 308کے تحت کیس درج کرکے تحقیقات شروع کی۔
پولیس بیان کے مطابق تحقیقات کے دوران ٹیکنیکی صلاحیتوں کو بروئے کار لانے کے ساتھ ساتھی سی سی ٹی وی فوٹیج کو کھنالا گیا جس دوران ملزم کی شناخت امتیاز احمد شاہ عرف 99ولد غلام قادر شاہ ساکن عقلمیر خانیار کے بطور ہوئی اور بعدازاں اس کی گرفتاری عمل میں لائی گئی۔
یہاں یہ امر قابل ذکر ہے کہ ملزم کے خلاف 30ایف آئی آردرج ہیں جس میں بھتہ خوری اور چوری کے مقدمات قابل ذکر ہے۔
دریں اثنا پولیس نے عوام الناس سے اپیل کی ہے کہ وہ سماج دشمن عناصر کے بارے میں نزدیکی پولیس اسٹیشن کے ساتھ رابط قائم کریں۔