عظمیٰ ویب ڈیسک

جموں// پارلیمانی انتخابات کیلئے بھارتیہ جنتا پارٹی کی مہم کو تیز کرنے کیلئے، وزیر اعظم نریندر مودی 12 اپریل کو اودھم پور-ڈوڈہ پارلیمانی حلقہ کے اودھم پور میں ایک بڑی ریلی سے خطاب کریں گے جبکہ مرکزی وزیر داخلہ امت شاہ رائے پور جموں میں 9 اپریل کو ایک بہت بڑی انتخابی ریلی سے خطاب کریں گے۔
اتر پردیش کے وزیر اعلی یوگی آدتیہ ناتھ 10 اپریل کو کٹھوعہ میں ایک اور بڑی ریلی کریں گے۔ سابق مرکزی وزیر شاہنواز حسین 13 اپریل کو ڈوڈہ میں ایک ریلی سے خطاب کریں گے۔
ادھم پور-ڈوڈہ سیٹ پر پہلے مرحلے میں 19 اپریل کو پولنگ ہوگی جبکہ جموں ریاسی سیٹ پر دوسرے مرحلے میں 26 اپریل کو ووٹنگ ہوگی۔
بی جے پی کے سینئر لیڈروں نے بتایا کہ وزیر اعظم 12 اپریل کو اودھم پور کے مودی گراونڈ میں بی جے پی امیدواروں ڈاکٹر جتیندر سنگھ (اودھم پور-ڈوڈہ) اور جگل کشور شرما (جموں-ریاسی) کیلئے ایک میگا ریلی سے خطاب کریں گے۔
اودھم پور ضلع، اودھم پور- ڈوڈہ حلقہ کا حصہ ہے، ریاسی اضلاع بشمول مقدس شہر کٹرہ، ماتا ویشنو دیوی کا بیس کیمپ جموں ریاسی سیٹ میں آتا ہے۔ اس لیے ادھم پور میں مودی کی ریلی جموں خطے کے بی جے پی کے دونوں امیدواروں کے لیے مشترکہ ہوگی۔
وزیر اعظم کے دفتر (پی ایم او) میں مرکزی وزیر مملکت ڈاکٹر جتیندر سنگھ اودھم پور-ڈوڈہ سیٹ کے لیے بی جے پی کے امیدوار ہیں جنہوں نے 2014 اور 2019 میں الیکشن جیتا تھا اور اب وہ تیسری مدت کے لیے امیدوار ہیں۔ اسی طرح، بی جے پی لیڈر جگل کشور شرما جموں سیٹ سے ہیٹ ٹرک کرنے کی کوشش کر رہے ہیں جنہوں نے اسے 2014 اور 2019 میں لگاتار دو بار جیتا تھا۔
رواں سال جموں و کشمیر میں وزیر اعظم کی یہ تیسری ریلی ہوگی۔ انہوں نے 20 فروری کو ایم اے سٹیڈیم جموں میں ایک بڑی ریلی اور 7 مارچ کو سری نگر کے بخشی سٹیڈیم میں ایک اور میگا ریلی سے خطاب کیا۔
بی جے پی لیڈروں نے کہا کہ مودی کی اودھم پور ریلی بھی ایک بڑا روڈ شو ہوگا۔
مرکزی وزیر داخلہ امت شاہ 9 اپریل کو رائے پور-ڈومانہ میں جموں-ریاسی بی جے پی امیدوار جگل کشور شرما کے لیے ایک انتخابی ریلی سے بھی خطاب کریں گے۔
بی جے پی کے رہنماوں نے کہا کہ یہ ایک بڑی ریلی ہوگی۔
انہوں نے مزید کہا کہ انتخابات کے تیسرے مرحلے میں بھی، شاہ ایک اور ریلی سے خطاب کریں گے، اس مرحلے میں راجوری- اننت ناگ لوک سبھا حلقہ پر الیکشن ہوں گے۔
بی جے پی نے ابھی تک اننت ناگ-راجوری-پونچھ حلقے کے لیے اپنے امیدوار کا نام ظاہر نہیں کیا ہے۔ تاہم نیشنل کانفرنس نے اس نشست کے لیے اپنے سینئر رہنما میاں الطاف سابق وزیر کا نام دیا ہے۔ ڈی پی اے پی کے چیئرمین اور سابق وزیر اعلیٰ غلام نبی آزاد بھی اسی حلقے سے الیکشن لڑیں گے۔ پیپلز ڈیموکریٹک پارٹی (PDP) بھی میدان میں کود سکتی ہے۔
مرکزی حکومت نے پہاڑیوں کو شیڈول ٹرائب (ایس ٹی) کا درجہ دیا تھا، جن کی راجوری اور پونچھ اضلاع میں بڑی آبادی ہے جو (ایک اسمبلی سیٹ کو چھوڑ کر) اننت ناگ حلقہ کا حصہ ہیں۔
بی جے پی لیڈروں نے کہا کہ اننت ناگ-راجوری-پونچھ لوک سبھا سیٹ پر پارٹی امیدوار کے نام کا اعلان کسی بھی وقت متوقع ہے۔
دریں اثنا، اتر پردیش کے وزیر اعلی یوگی آدتیہ ناتھ بھی 10 اپریل کو کٹھوعہ میں پارٹی امیدوار ڈاکٹر جتیندر سنگھ کے حق میں ایک بڑی عوامی ریلی سے خطاب کریں گے۔
جموں و کشمیر میں بی جے پی کے ابتدائی مہم چلانے والوں کی فہرست میں یوگی آدتیہ ناتھ کا نام ہے۔
ذرائع نے بتایا کہ پارٹی کے قومی صدر جگت پرکاش نڈا، وزیر دفاع راج ناتھ سنگھ، مرکزی وزیر روڈ ٹرانسپورٹ اور نیشنل ہائی ویز نتن گڈکری سمیت بی جے پی کے دیگر سینئر لیڈران اور وزراءسے بھی جموں و کشمیر میں بی جے پی امیدواروں کے لیے مہم چلانے کی توقع ہے لیکن ان کے دوروں کی تاریخیں ان کے جلسوں کے مقامات کا اعلان بعد میں کیا جائے گا۔
بی جے پی یو ٹی کے سربراہ رویندر رینا پورے جموں و کشمیر میں انتخابی مہم چلا رہے ہیں اور بی جے پی کی حمایت میں روزانہ کئی ریلیوں سے خطاب کر رہے ہیں۔