عظمیٰ ویب ڈیسک

سرینگر// انگلینڈ کے خلاف 28 جنوری سے 06 فروری کے درمیان احمد آباد گجرات میں کھیلی جانے والی پانچ میچوں کی ٹی20 کرکٹ سیریز کے لیے چار کشمیری کھلاڑیوں کو بھارتی جسمانی طور پر معذور مردوں کی ٹیم میں جگہ مل گئی ہے۔
سیریز کا انعقاد ڈیفرنٹلی ایبلڈ کرکٹ کونسل آف انڈیا (ڈی سی سی آئی) کر رہا ہے، جسے بی سی سی آئی کی حمایت حاصل ہے۔
کشمیر سے تعلق رکھنے والے وسیم اقبال (بلے باز)، جعفر امین بھٹ (بلے باز)، ماجد احمد ماگرے (آف سپنر) اور عامر حسن (تیز گیند باز) کو ٹیم انڈیا کے سکواڈ میں جگہ ملی ہے۔
ٹیم کے دیگر کھلاڑیوں میں وکرانت کینی (کپتان)، وسیم اقبال (نائب کپتان)، سوپنیل منگھیل، شانموگم ڈی، جعفر امین بھٹ، رادھیکا پرساد، رویندرا سانتے، یوگیندر بی، لوکیش مرگھڑے، ماجد احمد ماگرے، پون کمار، محمد صادق، ڈیووورو اکھل ریڈی، عامر حسین، سنی، شیو شنکرا جی ایس ہیں، جن کا تعلق ممبئی، مہاراشٹر، جموں و کشمیر، تامل ناڈو، مدھیہ پردیش، ودربھ، ہریانہ، دہلی، اندرا اور کرناٹک سے ہے۔
بھارت اور آسٹریلیا کے درمیان 2023 کے آئی سی سی کرکٹ ورلڈ کپ کے فائنل کی میزبانی کرنے والا نریندر مودی سٹیڈیم 06 فروری کو اختتامی تقریب کے ساتھ پانچ میچوں کی سیریز کے آخری میچ کی میزبانی کرے گا۔
اسی طرح پہلے دو میچ نریندر مودی سٹیڈیم کمپلیکس کے بی گراو¿نڈ میں کھیلے جائیں گے جبکہ تیسرا اور چوتھا میچ بالترتیب گجرات کالج اور ریلوے گراو¿نڈ میں کھیلا جائے گا۔