عظمیٰ ویب ڈیسک

جموں// مرکزی وزیر ڈاکٹر جتیندر سنگھ نے منگل کو یہاں مولانا آزاد سٹیڈیم میں وزیر اعظم نریندر مودی کے پروگرام کے انتظامات کے موقع پر حتمی جائزہ کے دوران میڈیا سے بات کرتے ہوئے کہا، “جموں و کشمیر کے لوگوں کا وزیرِ اعظم مودی کے ساتھ فطری تعلق ہے”۔
وزیر کے ساتھ حکومت ہند کے سینئر افسران اور جموں و کشمیر انتظامیہ انتظامیہ کی ایک ٹیم تھی جس کی قیادت صوبائی کمشنر جموں کر رہے تھے۔
ڈاکٹر جتیندر سنگھ نے کہا، ”وزیراعظم نریندر مودی کے کل جموں کے دورے کے موقع پر بہت زیادہ جوش و خروش پایا جاتا ہے، لوگ ان کی آمد کا بے صبری سے انتظار کر رہے ہیں“۔
انہوں نے کہا کہ مرکز کے زیر انتظام جموں و کشمیر کا ہر شہری اس پروگرام کا حصہ بننا چاہتا ہے۔
مرکزی وزیر شہر کے ایم اے سٹیڈیم میں منعقد ہونے والے وزیر اعظم کے پروگرام کے انتظامات کا جائزہ لینے کے بعد بات کر رہے تھے۔ ڈاکٹر جتیندر سنگھ کو سول انتظامیہ اور سیکورٹی ایجنسیوں کے عہدیداروں نے مودی کے عوامی پروگرام کیلئے کئے جانے والے وسیع اور ضروری انتظامات کے بارے میں بتایا۔
اُنہوں نے کہا، “مجھے خوشی ہے کہ سوسائٹی اور انتظامیہ دونوں نے مل کر اس کیلئے مناسب انتظامات کیے ہیں”۔
وزیر موصوف نے کہا کہ پورے یو ٹی کے لوگ اس تقریب میں شرکت کے لیے آرہے ہیں۔
انہوں نے بتایا کہ پونچھ، کشتواڑ اور رام بن سمیت دور دراز کے اضلاع سے تعلق رکھنے والے لوگ، جو اس پروگرام میں شرکت کریں گے، آج رات تو شہر پہنچیں گے، جب کہ پڑوسی اضلاع جیسے کٹھوعہ اور سانبہ کے لوگ کل صبح مقام پر پہنچیں گے۔
ڈاکٹر جتیندر سنگھ نے کہا کہ مدعو افراد کیلئے رہائش، ریفریشمنٹ اور صفائی ستھرائی کی سہولیات کے حوالے سے کافی انتظامات کیے گئے ہیں تاکہ وہ آرام سے پروگرام میں شرکت کر سکیں۔
ڈاکٹر جتیندر سنگھ نے بتایا کہ وزیر اعظم 30ہزار کروڑ روپے سے زیادہ کے پروجیکٹوں کا افتتاح کریں گے۔ انہوں نے کہا کہ ان منصوبوں کو حکومت ہند کے چار وزراءیعنی تعلیم، شہری ہوا بازی، ریلوے اور پٹرولیم کی وزارتوں نے انجام دیا ہے۔
مرکزی وزیر نے اس بات کا اعادہ کیا کہ وزیر اعظم مودی نے جموں و کشمیر کے بنیادی ڈھانچے کی ترقی کو اعلیٰ ترجیح دی ہے۔ انہوں نے کہا کہ مرکز کے زیر انتظام علاقے میں دو ایمز، آئی اائی ایم، آئی آئی ٹی اور آئی آئی ایم سی کا قیام اس بات کا ثبوت ہے کہ وزیر اعظم مودی جموں و کشمیر کو کتنی ترجیح دیتے ہیں۔
ڈاکٹر جتیندر سنگھ نے یاد دلایا کہ گزشتہ 70 سالوں میں جموں و کشمیر کیلئے اب تک کا سب سے بڑا ترقیاتی پیکیج مودی نے وزیر اعظم کا عہدہ سنبھالنے کے فوراً بعد دیا تھا۔ ڈاکٹر سنگھ نے مزید کہا کہ وزیر اعظم بننے کے فوراً بعد، مودی کو یو ٹی میں سیلاب کی صورتحال کا سامنا کرنا پڑا، اور انہوں نے اس آفت سے گزرا۔
انہوں نے کہا کہ مودی نے خطہ کی ترقی کے لیے نہ صرف بہت زیادہ جسمانی اور مالی مدد کی ہے بلکہ 5 اور 6 اگست 2019 کو ہونے والی آئینی تبدیلیاں لا کر ذہنی رکاوٹوں کو بھی دور کرنے کی کوشش کی ہے۔