لوک سبھا کا تعطل ختم، پیر سے ایوان میں کام کاج ہونے کی امید

عظمیٰ ویب ڈیسک
نئی دہلی/لوک سبھا کے اسپیکر اوم برلا نے ایوان میں جاری تعطل کو ختم کرنے کے لئے تمام جماعتوں کے سرکردہ لیڈروں کی میٹنگ بلائی جس میں تعطل کو ختم کرنے اور پیر کے روز سے ایوان کی کارروائی کو بحسن وخوبی چلانے پر اتفاق رائے ہو گیا ہے لوک سبھا سکریٹریٹ سے موصولہ اطلاع کے مطابق مسٹر برلا نے ایوان میں تعطل ختم کرنے کے لئے جمعہ کے روز تمام پارٹیوں کے سرکردہ لیڈروں کی میٹنگ بلائی۔ اس میٹنگ میں پارلیمانی امور کے وزیر کرن رجیجو، ارجن رام میگھوال کے علاوہ مختلف پارٹیوں کے نمائندوں نے شرکت کی۔
انہوں نے کہا کہ اجلاس میں تمام اپوزیشن جماعتوں کے ساتھ پیر کے روز سے ایوان کو بحسن وخوبی چلانے کے لیے اتفاق رائے ہو گیا ہے۔ اس سے قبل آج صبح جیسے ہی ایوان کی کارروائی شروع ہوئی، لوک سبھا اسپیکر نے ہنگامہ کرنے والے اراکین سے کہا کہ وہ حکومت کے نمائندے کو بلا کر اور اپوزیشن کے اراکین سے بات کرکے مسئلہ حل کرسکتے ہیں، لیکن اس کے لیے اراکین کو بحث کے لیے آنا ہوگا اور جان بوجھ کر ایوان میں رکاوٹ ڈالنے کا رجحان ترک کرنا ہوگا۔
انہوں نے کہا کہ تعطل کو ختم کرنے کے لیے سب کو آپس میں بات کرنی ہوگی اور ایوان کا م کاج چلنا چاہیے کیونکہ ملک کی 20-20 لاکھ آبادی ہر رکن سے اپنے مستقبل کے منصوبوں کے لیے آس رکھتی ہے اور وہ توقع کرتے ہیں کہ پارلیمنٹ میں ان کے نمائندے ملک کے مفاد کے لیے کام کریں گے۔