’’آپریشن سندھور ‘‘ :یہ تو صرف ٹریلر تھا اگر ضرورت پڑی تو ہم پوری تصویر دکھائیں گے: راجناتھ سنگھ

عظمیٰ ویب ڈیسک
سرینگر /’’آپریشن سندھور ‘‘ یہ تو صرف ٹریلر تھا ضرورت پڑی تو پوری طاقت ظاہر کی جائے گی کی بات کرتے ہوئے وزیر دفاع راجناتھ سنگھ نے آئی ایم ایف سے مطالبہ کیا کہ وہ پاکستان کو مالی امداد فراہم کرنے پر دوبارہ غور کرے ۔
انہوں نے کہا کہ دہشت گردی کے خلاف ہندوستان کی جنگ صرف سلامتی کا معاملہ نہیں ہے، یہ اب قومی دفاعی نظریے کا حصہ بن چکا ہے، اور ہم اس ہائبرڈ اور پراکسی جنگ کو جڑ سے اکھاڑ پھینکیں گے۔ انہوں نے زور دے کر کہا کہ موجودہ جنگ بندی کا مطلب یہ ہے کہ بھارت نے اپنے رویے کی بنیاد پر پاکستان کو پروبیشن پر رکھا ہوا ہے۔ اگر رویے میں بہتری آتی ہے، تو یہ ٹھیک ہے؛ لیکن اگر کوئی گڑبڑ ہوئی تو سخت ترین سزا دی جائے گی ۔
انہوں نے کہا ’’ دہشت گردی پر حملہ کرنا اور اسے ختم کرنائے ہندوستان کا نیا معمول ہے۔ یہ بتاتے ہوئے کہ پاکستان نے ہندوستان کے ذریعہ تباہ شدہ اپنے دہشت گردی کے بنیادی ڈھانچے کو دوبارہ تعمیر کرنا شروع کر دیا ہے۔ ‘‘ راجناتھ سنگھ نے بین الاقوامی مالیاتی فنڈ (آئی ایم ایف) سے مطالبہ کیا کہ وہ اسلام آباد کو دی جانے والی ایک بلین ڈالر کی امداد پر نظر ثانی کرے اور مستقبل میں بھی کوئی مدد فراہم کرنے سے گریز کرے۔
انہوں نے کہا کہ پاکستان اپنے شہریوں سے جمع کیے گئے ٹیکس کو جیش محمد دہشت گرد تنظیم کے سربراہ مسعود اظہر کو تقریباً 14 کروڑ روپے دینے کے لیے خرچ کرے گا، حالانکہ وہ اقوام متحدہ کی طرف سے نامزد دہشت گرد ہے۔ وزیر دفاع نے آپریشن سندھور میں ہندوستانی فضائیہ کے موثر کردار کی تعریف کی جس کی دنیا بھر میں تعریف کی جا رہی ہے۔
پاکستان اور پی او کے میں دہشت گردی کے کیمپوں کو صرف 23 منٹ میں ختم کرنے پر فضائی جنگجوؤں کی تعریف کرتے ہوئے، انہوں نے کہا ’’جب دشمن کے علاقے میں میزائل گرائے گئے تو دنیا نے ہندوستان کی بہادری اور طاقت کی بازگشت سنی‘‘۔
انہوں نے مزید کہا کہ آئی اے ایف نے دہشت گردی کے خلاف اس مہم کو آگے بڑھایا، اور آپریشن کے دوران، اس نے نہ صرف دشمن پر غلبہ حاصل کیا، بلکہ ان کا قلع قمع کیا۔راج ناتھ سنگھ نے روشنی ڈالی کہ ہندوستان کے لڑاکا طیارے سرحد پار کیے بغیر پاکستان کے ہر کونے کو نشانہ بنانے کی صلاحیت رکھتے ہیں۔
انہوں نے کہا ’’ دنیا نے دیکھا کہ کس طرح آئی اے ایف نے دہشت گردی کے کیمپوں اور بعد میں پاکستان کے ائیر بیسز کو تباہ کیا، آئی اے ایف نے یہ ثبوت دیا کہ ہندوستان کی جنگی پالیسی اور ٹیکنالوجی بدل چکی ہے، انہوں نے نئے ہندوستان کا پیغام دیا کہ ہم صرف جہاز سے درآمد ہونے والے ہتھیاروں اور پلیٹ فارم پر منحصر نہیں ہیں، بلکہ ہندوستان میں تیار کردہ آلات ہماری فوجی طاقت کا حصہ بن چکے ہیں‘‘۔
راجناتھ سنگھ نے مزید کہا کہ پاکستان نے خود ’براہموس‘ میزائل کی طاقت کو تسلیم کیا ہے۔ اس میڈ ان انڈیا میزائل نے رات کی تاریکی میں پاکستان کو دن کی روشنی دکھائی، انہوں نے ہندوستان کے فضائی دفاعی نظام کی بھی تعریف کی، جس میں ڈی آر ڈی او کے تیار کردہ آکاش اور دیگر ریڈار سسٹم نے زبردست کردار ادا کیا ہے۔