عظمیٰ ویب ڈیسک
بنی/جموں// ڈیموکریٹک پروگریسو آزاد پارٹی کے چیئرمین غلام نبی آزاد نے کہا ہے کہ آرٹیکل 370 کی بحالی صرف بھارت سرکار کر سکتی ہے۔ انہوں نے نیشنل کانفرنس اور کانگریس پر جموں و کشمیر کی ریاستی حیثیت کی بحالی کے معاملے پر تنقید کی۔
آزاد نے کہا کہ وزیر اعظم نریندر مودی اور وزیر داخلہ امیت شاہ پہلے ہی ریاستی حیثیت بحال کرنے کا وعدہ کر چکے ہیں۔
آزاد نے بتایا کہ لوگ دس سال بعد انتخابات میں حصہ لے رہے ہیں اور اس پر کافی جوش و خروش پایا جاتا ہے۔
انہوں نے مزید کہا کہ نیشنل کانفرنس یا پی ڈی پی نے پارلیمنٹ میں آرٹیکل 370 اور ریاستی حیثیت پر کچھ نہیں کہا تھا، بلکہ میں نے اس پر بات کی۔ وزیر اعظم اور وزیر داخلہ نے کہا تھا کہ وہ ریاستی حیثیت بحال کریں گے۔
آزاد نے بنی اسمبلی حلقے میں اپنی پارٹی کے امیدوار کے لیے انتخابی مہم کے دوران عوامی جلسے سے خطاب کیا اور لوگوں سے اتحاد اور ترقی کے لیے ووٹ دینے کی اپیل کی۔
انہوں نے کہا، “ڈی پی اے پی کو ووٹ دے کر بنی کے عوام ایک خوشحال اور جامع مستقبل کی راہ ہموار کر سکتے ہیں”۔
