عظمیٰ ویب ڈیسک
سری نگر/بھارتیہ جنتا پارٹی کے رکن پارلیمان اور سابق مرکزی وزیر انوراگ ٹھاکر نے منگل کو کہا کہ ’ون نیشن، ون الیکشن‘کا فارمولہ نہ صرف ملک کے لیے سودمند ثابت ہوگا بلکہ اس سے انتخابی اخراجات میں بھی خاطر خواہ کمی آئے گی ۔
سری نگر میں پارٹی کی جانب سے منعقدہ ایک تقریب کے موقع پر صحافیوں سے گفتگو کرتے ہوئے انوراگ ٹھاکر نے کہا کہ ’اگر تمام اسمبلی اور لوک سبھا انتخابات ایک ساتھ منعقد ہوں، تو اس سے صرف امیدواروں اور سیاسی جماعتوں کے اخراجات میں کمی نہیں آئے گی بلکہ عوامی پیسہ بھی بچے گا اور ووٹنگ فیصد میں اضافہ ہوگا۔‘انہوں نے مزید کہا کہ 2024 کے لوک سبھا انتخابات میں تقریباً 1.5 لاکھ کروڑ روپے خرچ ہوئے، جو ملک کی جی ڈی پی میں 1.5 فیصد کا اضافہ کر سکتے تھے۔
انوراگ ٹھاکر نے کہا کہ انتخابات کے دوران انتخابی ضابطہ عمل کے نفاذ سے ترقیاتی کام سست پڑ جاتے ہیں۔ ایک انتخاب 45 سے 90 دن لے لیتا ہے جبکہ حکومت بننے میں بھی وقت لگتا ہے۔
انہوں نے کہا کہ اگر ’ون نیشن، ون الیکشن‘ فارمولے کو 2029 میں نافذ کیا جاتا ہے، تو جن ریاستوں میں 2027 میں اسمبلی انتخابات ہونے ہیں، ان کی مدت دو سال تک محدود ہوگی تاکہ 2029 میں تمام انتخابات ایک ساتھ منعقد ہوں۔
ریاستی حیثیت کی بحالی سے متعلق سوال پر انوراگ ٹھاکر نے کہا کہ ’بی جے پی نے وعدہ کیا ہے اور جموں و کشمیر کو ریاستی درجہ ملے گا۔‘جموں خطے میں حالیہ دہشت گرد حملوں کے بارے میں انہوں نے کہا کہ بی جے پی کی دہشت گردی کے خلاف زیرو ٹالرنس پالیسی ہے۔ ملک بھر میں نکسل ازم اور دہشت گردی سے سختی سے نمٹا جا رہا ہے۔ کشمیر میں پہلے کے مقابلے میں اب کافی سکون ہے۔
جب ان سے وقف ترمیمی قانون پر سپریم کورٹ میں زیر سماعت معاملے میں بی جے پی پر دباؤ ڈالنے کے الزامات کے بارے میں پوچھا گیا، تو انہوں نے کہا، ’ہم کسی پر دباؤ نہیں ڈال رہے۔ ہمارے قومی صدر نے یہ واضح کر دیا ہے۔‘
انہوں نے کہا کہ اپوزیشن نے آرٹیکل 370، تین طلاق، رام مندر اور سی اے اے جیسے مسائل پر عوام کو گمراہ کیا۔ سپریم کورٹ میں جب یہ معاملات پہنچے، تو حکومت کا موقف درست ثابت ہوا۔
انہوں نے راہل گاندھی پر تنقید کرتے ہوئے کہا، “وہ بھارت میں انتخابات ہارتے ہیں اور بیرونِ ملک جا کر ملک کے خلاف مہم چلاتے ہیں۔ ان کے سرپرست سام پترودا نے آئین پر دیے گئے بیانات اور دولت کی از سر نو تقسیم جیسے خیالات سے ثابت کیا ہے کہ ان کے نظریات تضادات سے بھرے ہوئے ہیں۔
’ون نیشن، ون الیکشن‘ سے اخراجات میں کمی اور جمہوریت کو استحکام ملے گا: انوراگ ٹھاکر
