عظمیٰ ویب ڈیسک

سرینگر// جموں و کشمیر کی عوام کے ساتھ براہ راست رابطے کو مزید مضبوط بنانے کے لیے وزیر اعلیٰ عمر عبداللہ نے آج وزیر اعلیٰ پبلک سروسز اینڈ آؤٹ ریچ آفس، جسے “رابطہ” کا نام دیا گیا ہے، میں اپنی پہلی عوامی ملاقات کا انعقاد کیا۔
اس موقع پر وزیر اعلیٰ نے کہا کہ اِس دفتر کا قیام عوامی شکایات کو دور کرنے اور حکومت اور شہریوں کے درمیان صحت مند تعلقات کو فروغ دینے کے لیے ایک مخصوص پلیٹ فارم فراہم کرنے کے مقصد سے کیا گیا ہے۔
تقریب کے دوران 15 مختلف وفود نے وزیر اعلیٰ سے ملاقات کی، جو مختلف سماجی، ثقافتی اور پیشہ ورانہ تنظیموں کی نمائندگی کر رہے تھے۔
وفود نے اقتصادی مسائل، ثقافتی تحفظ، روزگار سے متعلقہ امور، اور مختلف شعبوں کی ترقی جیسے موضوعات پر تبادلہ خیال کیا اور وزیر اعلیٰ کی توجہ ان مسائل کی جانب مبذول کرائی۔
جموں و کشمیر کی منفرد ثقافتی وراثت کے تحفظ کا معاملہ بھی نمایاں طور پر زیر بحث آیا، جہاں وفود نے مقامی زبانوں کے فروغ، ثقافتی ورثے کی حفاظت، اور سماجی بہبود کے منصوبوں کے نفاذ کی اپیل کی۔
وزیر اعلیٰ عمر عبداللہ نے ان مسائل کو توجہ سے سنا اور خطے کی منفرد شناخت کے تحفظ کے لیے ایک جامع حکمت عملی اپنانے کی ضرورت پر زور دیا۔