عظمیٰ ویب ڈیسک

جموں// جموں لوک سبھا حلقہ کیلئے ہفتہ کو کاغذات کی جانچ پڑتال کے دوران تین امیدواروں کے کاغذات نامزدگی مسترد کردیئے گئے ہیں، جس سے 23 امیدوار میدان میں رہ گئے۔
جموں حلقے میں لوک سبھا انتخابات کے دوسرے مرحلے میں 26 اپریل کو ووٹ ڈالے جائیں گے۔
انہوں نے بتایا کہ جموں پارلیمانی حلقہ کے ریٹرننگ آفیسر (آر او) سچن کمار ویشیا نے آئندہ لوک سبھا انتخابات کیلئے امیدواروں کے ذریعہ جمع کرائے گئے کاغذات نامزدگی کی جانچ پڑتال کی۔
پوری جانچ پڑتال کے بعد، 23 امیدواروں کے نامزدگی فارم درست پائے گئے، جبکہ تین امیدواروں، دو کورنگ امیدواروں – چنرن جیت چرگوترہ (بی ایس پی) اور اندرا بھلا (کانگریس) – اور آزاد امیدوار رویندر سنگھ کے کاغذات کو معمول کے مطابق مسترد کر دیا گیا۔
ریٹرنگ آفیسر نے کہا کہ ایک کورنگ امیدوار کو پارٹیوں کی طرف سے بیک اپ کے طور پر میدان میں اتارا جاتا ہے اگر ریٹرننگ افسر کے ذریعہ مرکزی نامزد کے کاغذات مسترد ہو جاتے ہیں۔
23 امیدواروں میں سے بی جے پی کے موجودہ ایم پی جوگل کشور اور کانگریس کے رمن بھلا کے درمیان براہ راست مقابلہ ہے۔ کشور 2014 اور 2019 کے انتخابات میں جموں لوک سبھا سیٹ کو کامیابی کے ساتھ برقرار رکھنے کے بعد جیت کی ہیٹ ٹرک کی تلاش میں ہیں۔
اس سیٹ سے بہوجن سماج پارٹی کے جگدیش راج اور ایکم سناتن بھارت دل کے انکور شرما دوسرے نمایاں امیدوار ہیں۔
جاری کردہ انتخابی نوٹیفکیشن کے مطابق امیدوار ریٹرننگ آفیسر کے دفتر میں 8 اپریل کو سہ پہر 3 بجے سے پہلے کاغذات نامزدگی واپس لے سکتے ہیں۔