مرکز کے ساتھ تعاون کا مطلب ان کے تمام فیصلوں کو قبول کرنا نہیں: عمر عبداللہ

سرینگر// جموں و کشمیر کے وزیر اعلیٰ عمر عبداللہ نے کہا ہے کہ وزیر اعظم نریندر مودی کی قیادت میں مرکزی حکومت کے ساتھ کام کرنا یہ نہیں کہ وہ ان کے تمام فیصلوں کو تسلیم کرتے ہیں۔
انہوں نے وضاحت دیتے ہوئے کہا کہ جہاں ضرورت نہ ہو، وہاں مرکزی حکومت سے متنازعہ تعلقات استوار کرنا بے سود ہے۔ ان کا ماننا ہے کہ جموں و کشمیر میں ترقی اور خوشحالی کے لیے مرکز کے ساتھ عملی اور متوازن تعلقات ضروری ہیں۔
عمر عبداللہ نے مزید کہا کہ وزیر اعظم مودی کی حکومت کے ساتھ کام کرنے کا مطلب ہر فیصلہ قبول کرنا نہیں ہے، اور اگر حالات اس بات کا تقاضا کریں تو وہ اس کے مطابق ردعمل دیں گے۔ تاہم، اس وقت ایسی کوئی صورتحال نہیں ہے۔
ریاستی درجہ کی بحالی پر گفتگو کرتے ہوئے انہوں نے کہا کہ اگر ہم اس بات پر متفق ہیں کہ جموں و کشمیر کو ترقی کی ضرورت ہے، تو ریاستی درجہ کی بحالی ناگزیر ہے۔
یونین ٹریٹری کے وزیر اعلیٰ کے طور پر اپنے تجربات شیئر کرتے ہوئے عمر عبداللہ نے کہا کہ یہ ایک سیکھنے کا عمل رہا ہے۔ انہوں نے بتایا کہ سب سے بڑی مشکل یہ ہے کہ جموں و کشمیر میں دو طاقت کے مراکز ہیں: ایک لیفٹیننٹ گورنر کے پاس اور دوسرا منتخب وزیر اعلیٰ کے پاس، جس کی وجہ سے انتظامی معاملات پیچیدہ ہو جاتے ہیں۔
عمر عبداللہ نے کہا کہ جب دہلی میں طاقت کا مرکز واضح طور پر تقسیم ہے، تو جموں و کشمیر میں یونین ٹریٹری کے ماڈل کی کارکردگی میں مسائل آ رہے ہیں، جو کہ ایک عارضی صورتحال ہے اور جلد ہی یہ تبدیل ہو جائے گی۔
ریاستی حیثیت کی بحالی کے حوالے سے عمر عبداللہ نے کہا کہ وزیر اعظم، وزیر داخلہ اور دیگر رہنماؤں نے اس وعدے کی تصدیق کی ہے کہ ریاستی حیثیت جلد بحال کی جائے گی، اور وہ اس سلسلے میں امید رکھتے ہیں کہ یہ عمل جلد مکمل ہو گا۔
سیاسی قیدیوں کی رہائی کے حوالے سے عمر عبداللہ نے کہا کہ ایسے افراد کے لیے معافی دی جانی چاہیے جن پر سنگین الزامات نہیں ہیں اور جنہیں طویل عرصے سے قید میں رکھا گیا ہے، لیکن ان کے خلاف کوئی الزام عائد نہیں کیا گیا۔