این سی کیساتھ حکومت بنانے کا کوئی امکان نہیں : سنیل شرما ’عمر عبداللہ ہمیشہ سیر سپاٹے کے موڈ میں،پُر تکلف ظہرانوں وعشائیوں سے عوامی مسائل حل نہیں ہونگے‘

عظمیٰ نیوزڈیسک
سرینگر//جموں و کشمیر اسمبلی میں اپوزیشن لیڈر سنیل کمار شرما نے منگل کو کہا کہ بی جے پی کے نیشنل کانفرنس کے ساتھ جموں و کشمیر میں حکومت بنانے کے کوئی امکانات نہیں ہیں۔ شرما نے زور دے کر کہا کہ پارٹی مرکز کے زیر انتظام علاقے میں عام لوگوں کو درپیش مسائل پر حکومت سے جواب طلب کرے گی۔
خبر رساں ایجنسی کشمیر نیوز آبزرو کے ساتھ ایک خصوصی بات چیت میں شرما نے زور دے کر کہا کہ این سی کے ساتھ حکومت بنانے کا سوال ہی پیدا نہیں ہوتا۔ شرما نے کہا’’ہم اپوزیشن میں ہیں، اور ہم تعمیری اپوزیشن کا کردار ادا کریں گے اور عمر عبداللہ کی زیرقیادت حکومت سے عام لوگوں کو درپیش مسائل پر جواب طلب کریں گے‘‘۔شرما، جنہوں نے 2024 میں جموں و کشمیر کے انتخابات میں بی جے پی کی اب تک کی بہترین کارکردگی میں کلیدی کردار ادا کیا اور دہلی کے انتخابات میں پارٹی کے لیے مہم چلائی،نے عمر عبداللہ پر گورننس کے معاملات میں غیر سنجیدہ ہونے کا الزام لگایا۔
انکاکہناتھا’’این سی کی قیادت والی حکومت کے بے حس رویے کی وجہ سے عام عوام پریشانی کا شکار ہیں۔ جموں، ڈوڈہ کشتواڑ، یا کشمیر میں بھی عام لوگوں کی تکالیف اور تکالیف سننے والا کوئی نہیں ہے۔ وزیر اعلیٰ عمر عبداللہ ہمیشہ سیرسپاٹے کے موڈ میں رہتے ہیں۔ دہلی کے پانچ ستارہ ہوٹلوں میں پُر تکلف ظہرانوں اور عشائیوں کی میزبانی کرتے ہیںجن سے لوگوںکی تکالیف کم نہیں ہونگی‘‘۔
شرما نے کہا کہ بی جے پی اسمبلی کے اندر اور باہر عام لوگوں کے مسائل کو اٹھانے میں کوئی کسر نہیں چھوڑے گی۔ انہوںنے کہا’’ہم مفت بجلی سے لے کر 12گیس سلنڈروں سے لے کر مفت راشن تک کے انتخابی وعدوں پر حکومت کو جوابدہ بنائیں گے۔ وہ جموں و کشمیر کے سادہ لوح عوام کو دھوکہ نہیں دے سکتے ۔ انہیں اپنے ہر وعدے کا جواب دینا پڑے گا جو عوام سے کیے گئے ہیں‘‘۔
تاہم، انہوں نے مزید کہا کہ وہ اسمبلی میںکسی بھی مخالف آئین یا ملک مخالف بل یا قرارداد کی اجازت نہیں دیں گے۔ انہوں نے کہا کہ’’ہم ایسے کسی بھی اقدام کی مخالفت کریں گے‘‘۔