عظمیٰ ویب ڈیسک

جموں// این ڈی پی ایس ایکٹ کے تحت 18 مارچ کو گرفتار کیا گیا امرتسر کا ایک منشیات سمگلر جمعہ کو ہائی کورٹ کمپلیکس، جانی پور جموں سے پولیس کی حراست سے فرار ہوگیا۔
سیہورا تحصیل، امرتسر، پنجاب کے ملزم بلراج سنگھ کو 18 مارچ کو پولیس چوکی نروال کی ایک ٹیم نے 9 گرام ہیروئن نما مادہ کے ساتھ گرفتار کیا تھا اور اس کے ساتھ ایک دوسرے شخص کو بھی گرفتار کیا گیا تھا، جس کی شناخت پون کمار ساکنہ گڑھ سمنا بنج، اودھم پور کے طور پر کی گئی، اُس کے قبضے سے 6 گرام ہیروئن نما مادہ برآمد کیا گیا تھا۔
پولیس ذرائع نے بتایا کہ دونوں ملزمین کے خلاف این ڈی پی ایس ایکٹ کی دفعہ 8، 21، 22، 25، 29 کے تحت پولیس تھانہ باہو فورٹ میں ایک مقدمہ ایف آئی آر نمبر 65/2024 درج کیا گیا تھا۔
اُنہوں نے بتایا کہ جمعہ کو پولیس نے ملزمان کو ہائی کورٹ کمپلیکس کی ایک عدالت میں پیش کیا تاکہ ان سے مزید پوچھ گچھ کے لیے تحویل طلب کی جا سکے، جس دوران اُن میں سے ایک موقع سے فرار ہو گیا۔
پولیس ابھی تک ملزم کے ٹھکانے کا پتہ نہیں لگا سکی تاہم اس کی تلاش تکنیکی اور وسائل کے ذریعے کیا جا رہا ہے۔