عظمیٰ ویب ڈیسک

جموں// پی ڈی پی سربراہ محبوبہ مفتی کے کشمیر میں تینوں لوک سبھا حلقوں سے الیکشن لڑنے کے نیشنل کانفرنس کے فیصلے پر ناراضگی کا اظہار کرنے کے بعد، این سی کے صدر فاروق عبداللہ نے ہفتہ کو کہا کہ دونوں پارٹیاں انڈیا اتحاد کا حصہ ہیں اور این سی کشمیر کی تینوں سیٹوں پر کامیابی حاصل کرے گی۔
فاروق عبداللہ نے کہا، “مجھے نہیں معلوم کہ انہوں نے (محبوبہ مفتی) نے کیا کہا تھا… نیشنل کانفرنس اپنے پیروں پر کھڑی ہے اور اس نے 2019 کے عام انتخابات میں تین سیٹیں جیتی ہیں۔ ہم انڈیا اتحاد کا حصہ ہیں اور وہ بھی اس اتحاد کا حصہ ہے۔ اگر نیشنل کانفرنس (یہ سیٹیں) دوبارہ جیت جاتی ہے، تو وہ یہ انڈیا اتحاد کی جیت ہو گی، اس میں کیا مسئلہ ہے”۔
این سی لیڈر نے کہا کہ انہیں یقین ہے کہ انڈیا اتحاد ہمیشہ ترقی کرے گا کیونکہ اس کی ضرورت “بھارت اور جمہوریت کے مستقبل کیلئے” ہے۔ انہوں نے کہا، ”ہر کوئی ایک سیکولر بھارت چاہتا ہے جہاں ہم سب امن، ہم آہنگی اور ترقی کے ساتھ رہ سکیں“۔
اُنہوں نے کہا، “بھارت سب کیلئے ہے۔ بھارت پاکستان نہیں ہے۔ بھارت کا آئین اس خطوط پر بنایا گیا تھا کہ ہم سب ایک ہیں۔ اس سے کیا فرق پڑتا ہے کہ آپ کون سا مذہب رکھتے ہیں اور آپ کون سی زبان بولتے ہیں اور آپ کی ثقافت کیا ہے۔ یہ ایک متحدہ ہندوستان ہے“۔
پی اے جی ڈی پر محبوبہ مفتی کے ریمارکس کے بارے میں پوچھے جانے پر، انہوں نے کہا کہ اسمبلی انتخابات آنے والے ہیں اور “ہم دیکھیں گے کہ ہم کیا کریں گے۔ مجھے یقین ہے کہ وہ (بی جے پی زیرقیادت حکومت) پارلیمانی انتخابات کے ساتھ اسمبلی انتخابات کرانے کی کوشش کرے گی”۔
این سی نے اعلان کیا ہے کہ پارٹی وادی کشمیر میں تین سیٹوں پر الیکشن لڑے گی اور کانگریس سے جموں خطے میں دو سیٹوں پر مقابلہ کرنے کو کہا ہے۔ پارٹی نے یہ بھی کہا کہ لداخ سیٹ پر این سی اور کانگریس کا متفقہ امیدوار ہوگا۔
محبوبہ مفتی نے جمعہ کو کہا تھا کہ این سی کا فیصلہ “مایوس کن” اور “جموں و کشمیر کے لوگوں کی امیدوں کو دھچکا” ہے۔ اُنہوں نے این سی پر اپنے پیپلز الائنس فار گپکر ڈیکلریشن (پی اے جی ڈی) کو “مذاق” بنانے کا الزام لگایا۔
پی اے جی ڈی پر، مفتی نے جمعہ کو کہا کہ “اتحاد کو ٹوٹتا دیکھنا مشکل ہے”۔ انہوں نے کہا کہ مجھے افسوس ہے کہ ہم نے جو پانچ سال تک پالا تھا وہ بکھر گیا ہے۔ جموں و کشمیر کی سابق وزیر اعلیٰ نے کہا کہ اگر این سی قیادت نے ان سے اس مسئلہ پر بات کی تو پی ڈی پی وادی کی تینوں سیٹوں پر این سی کو مقابلہ کرنے دے سکتی تھی، تاہم، انہوں نے کہا کہ پی ڈی پی اب بھی انڈیا بلاک کا حصہ ہے اور پارٹی کانگریس کے ساتھ مستقبل کی حکمت عملی پر تبادلہ خیال کرے گی۔
پاکستان میں نئی حکومت کی تشکیل اور بھارت کے تئیں اس کے ممکنہ نقطہ نظر کے بارے میں پوچھے جانے پر، عبداللہ نے ہفتے کے روز کہا کہ اسلام آباد کو فیصلہ کرنا ہے کہ آیا وہ بھارت کے ساتھ پرامن تعلقات چاہتا ہے یا نہیں۔
اُنہوں نے کہا کہ پاکستان جو کچھ کرتا ہے، وہ ان کا مسئلہ ہے۔ یہ ان کی قوم ہے اور انہیں فیصلہ کرنا ہے کہ وہ ہمارے ملک کے ساتھ امن سے رہنا چاہتے ہیں یا امن سے نہیں رہنا چاہتے۔
انہوں نے کہا، ”کشمیر کا بھارت کے ساتھ مہاراجہ ہری سنگھ نے الحاق کیا تھا اور الحاق آج بھی ہے اور ہمیشہ رہے گا“۔
عبداللہ نے مزید کہا، ”ہم بھارت کا حصہ ہیں اور ہمارے لیے کوئی مسئلہ نہیں ہے۔ یہ فیصلہ ان کا ہے کہ وہ کیا کرنا چاہتے ہیں“۔
سماج وادی پارٹی کے سربراہ اکھلیش یادو کے وزیر اعظم نریندر مودی کو ایڈولف ہٹلر سے تشبیہ دینے کے بیان پر سوال پر انہوں نے کہا کہ مجھے نہیں معلوم کہ انہوں نے کیا کہا اور کن حالات میں کہا۔
این سی صدر نے کہا، ”وہ (مودی) بی جے پی کے وزیر اعظم نہیں ہیں۔ جن لوگوں نے انہیں ووٹ دیا وہ صرف 37 فیصد ہیں لیکن ایک بار جب کوئی وزیر اعظم بن جاتا ہے تو وہ ہر باشندے کی نمائندگی کرتا ہے۔ جب وہ ملک سے باہر جاتا ہے تو وہ 1.4 بلین کی بھی نمائندگی کرتا ہے“۔
انہوں نے کہا کہ وہ مسلمان، ہندو، سکھ، عیسائی اور ہر دوسرے مذہب اور ان لوگوں کی نمائندگی کرتے ہیں۔