مغل روڈ پر برف ہٹانے کا کام مکمل، ٹریفک کی بحالی کل متوقع

سرینگر// ٹریفک حکام نے پیر کو کہا کہ موسم سازگار رہنے کی صورت میں مغل روڈ کل ٹریفک کی آمدورفت کے لیے بحال کیا جائے گا۔
اُنہوں نے کہا کہ جموں و کشمیر مکینیکل انجینئرنگ ڈیپارٹمنٹ نے شاہراہ کے دونوں سروں—شوپیاں اور پونچھ—سے برف ہٹانے کا عمل مکمل کر لیا ہے۔
انہوں نے کہا، “پونچھ کی جانب سے پیر کی گلی تک برف صاف کرنے کا کام مکمل کر لیا گیا ہے۔ اتوار کی شام کو شوپیاں کی جانب سے بھی پیر کی گلی تک برف ہٹانے کا عمل مکمل کیا گیا تھا”۔
مغل روڈ، جو راجوری اور پونچھ اضلاع کو وادیٔ کشمیر سے جوڑتا ہے، جمعہ کو تازہ برفباری کے بعد بند ہو گئی تھی۔ تاہم، شوپیاں کی طرف سے برف ہٹانے کا کام اتوار کی شام کو مکمل کر لیا گیا، جبکہ پونچھ کی طرف سے پیر کی دوپہر کو کام مکمل کیا گیا ہے۔
مکینیکل انجینئرنگ ڈپارٹمنٹ کے اسسٹنٹ انجینئر طارق محمود نے بتایا کہ سڑک سے برف کو سنگل لین کی بنیاد پر ہٹانے کے بعد اب محکمہ کے اہلکار اور مشینری دو طرفہ آمدورفت کے لیے سڑک کو چوڑا کرنے کا کام کر رہے ہیں۔
انہوں نے مزید کہا کہ پونچھ کی جانب سے برف ہٹانے والی مشینری پیر کی گلی پہنچ چکی ہے، جہاں شوپیاں کی جانب سے مشینری پہلے ہی موجود تھی اور وہ اتوار کی شام اپنا کام مکمل کر چکی تھی۔
سب ڈویژنل مجسٹریٹ (ایس ڈی ایم) سرنکوٹ فاروق خان نازکی نے کہا کہ موسم صاف رہنے کی صورت میں مغل روڈ منگل کو ٹریفک کے لیے کھول دی جائے گی۔
انہوں نے کہا، “سڑک پر جمع برف کو پیر کی گلی تک صاف کر دیا گیا ہے اور ہم توقع کر رہے ہیں کہ کل صبح تک موسم سازگار رہنے کی صورت میں سڑک کو بحال کر دیا جائے گا”۔