فنڈز میں خردبرد: اے سی بی نے استاد، ٹھیکیدار اور دیگر ان کے خلاف مقدمہ درج کر لیا

عظمیٰ ویب ڈیسک
سرینگر/جموں و کشمیر انسدادِ بدعنوانی بیورو نے جمعہ کو ایک سرکاری اسکول کے اُس وقت کے استاد، انچارج ہیڈماسٹر، ایک ٹھیکیدار اور دیگر افراد کے خلاف فنڈز میں خردبرد کے الزام میں مقدمہ درج کرنے کی اطلاع دی ہے۔
اے سی بی کے ترجمان نے جاری ایک بیان میں کہا کہ بیورو نے پولیس اسٹیشن اے سی بی اُدھمپور میں ایف آئی آر نمبر 01/2025 کے تحت جموں و کشمیر پریونشن آف کرپشن ایکٹ، سوت۔ 2006 کی دفعات 5(1)(d) اور 5(2) اور آر پی سی کی دفعہ 120-B کے تحت ایک سرکاری ملازم سجاد حسین، اُس وقت کے استاد (انچارج ہیڈماسٹر) گورنمنٹ مڈل اسکول جنڈریلی، زون چسانہ، ضلع ریاسی، ٹھیکیدار عبدالعزیز اور دیگر کے خلاف مقدمہ درج کر کے تحقیقات شروع کر دی ہے۔
بیان میں کہا گیا کہ اے سی بی نے مذکورہ سرکاری افسر کے خلاف ایک رپورٹ موصول ہونے کے بعد انکوائری کی، جو ڈائریکٹر اسکول ایجوکیشن جموں کی طرف سے موصول ہوئی تھی، جس میں اسکول عمارت میں ناقص موادکے استعمال اور فنڈز کے غلط استعمال کے الزامات کی تصدیق کی گئی تھی۔
تحقیقات کے دوران یہ سامنے آیا کہ سال 2016-17 کے دوران زونل ایجوکیشن آفیسر چسانہ کی جانب سے سجاد حسین کے حق میں ایس ایس اے اسکیم کے تحت گورنمنٹ مڈل اسکول جنڈریلی کی عمارت کی تعمیر کے لیے 11.50 لاکھ روپے جاری کیے گئے۔
بیان میں مزید کہا گیا کہ سجاد حسین نے یہ تعمیراتی کام ٹھیکیدار عبدالعزیز کے ذریعے انجام دیا، مگر مقررہ قواعد و ضوابط اور ضروری رسمی کارروائیوں کی پاسداری نہیں کی گئی، اور فنڈز کا استعمال بھی بغیر قاعدے کے کیاگیا۔
اے سی بی کی انجینئرنگ ونگ کی جانب سے کیے گئے موقع کے معائنے کے دوران کئی خامیاں سامنے آئیں، جن میں سلیب اور بیم کے درمیان دراڑیں، بجلی کا کام نہ ہونا، فیس لفٹنگ، سیمنٹ فلورنگ، شیشے کی پٹیوں، دروازے/کھڑکیوں/شیٹر کی تنصیب نہ ہونا شامل ہیں۔
ترجمان کے مطابق، اس کے علاوہ کیش بک کی عدم دیکھ بھال اور ادائیگیاں قواعد و ضوابط کے بغیر کرنا بھی نوٹ کیا گیا، جس کے نتیجے میں سرکاری خزانے کو 1,65,634.86 روپے کا نقصان پہنچا۔
اے سی بی ترجمان نے مزید کہا کہ سجاد حسین نے اپنے عہدے کا ناجائز فائدہ اٹھاتے ہوئے ٹھیکیدار عبدالعزیز اور دیگر کے ساتھ ملی بھگت کر کے اسکول کی عمارت کا ناقص کام کروایا، جس سے ٹھیکیدار اور دیگر کو غیر قانونی فائدہ پہنچا اور خود کو بھی مالی فائدہ حاصل ہوا۔ مزید تحقیقات جاری ہیں۔