عظمیٰ ویب ڈیسک

سرینگر// محکمہ موسمیات نے جمعہ کو جموں و کشمیر میں کل سے اگلے 2 دن تک برف و باراں کی پیش گوئی کی ہے۔
محکمہ موسمیات کے ترجمان نے بتایا کہ جمعہ کو موسم عام طور پر خشک رہے گا اور الگ تھلگ بالائی مقامات پر ہلکی برفباری کا امکان ہے۔
اُنہوں نے کہا کہ 3 سے 4 فروری تک موسم عام طور پر دوپہر تک ابر آلود رہے گا اور کئی مقامات پر شام سے 4 فروری کی شام تک ہلکی سے درمیانی برف/بارش ہونے کا امکان ہے اور الگ تھلگ بالائی مقامات پر بھاری برفباری کے امکانات ہیں۔
محکمہ موسمیات کے ترجمان نے کہا کہ شمال، شمال مغربی اور جنوبی کشمیر کے درمیانی اور بالائی علاقوں میں 8 سے 12 انچ تک برف پڑ سکتی ہے، میدانی علاقوں میں 3 سے 6 انچ تک برف پڑ سکتی ہے، جب کہ وسطی کشمیر کے میدانی علاقوں میں 1 سے 2 انچ برف کے ساتھ بارش ہو سکتی ہے۔
انہوں نے کہا کہ جموں صوبہ میں مذکورہ مدت کے دوران پیرپنجال رینج اور وادی چناب کے اونچے علاقوں میں گرج چمک کے ساتھ ہلکی سے درمیانی بارش ہو سکتی ہے۔
ترجمان نے کہا کہ 5 فروری کو موسم جزوی طور پر ابر آلود رہے گا اور الگ تھلگ بالائی علاقوں میں ہلکی برفباری کا امکان ہے، انہوں نے مزید کہا کہ 6 سے 13 فروری تک موسم عام طور پر خشک رہے گا۔
3 فروری کی شام سے 4 فروری کی شام کے دوران خراب موسم کے پیش نظر، انہوں نے مسافروں کو مشورہ دیا کہ وہ اس کے مطابق منصوبہ بندی کریں اور انتظامیہ/ٹریفک پولیس کی ایڈوائزری پر عمل کریں۔