دوران شب سرینگر میں سڑک حادثہ ایک جاں بحق، دوسرا زخمی

عظمیٰ ویب ڈیسک

سرینگر/سرینگر کے شالٹینگ علاقے کے قریب گزشتہ رات کو پیش آئے ایک سڑک حادثے میں ایک شخص جاں بحق جبکہ دوسرا زخمی ہو گیاـ
ایک سرکاری عہدیدار نے بتایا کہ یہ حادثہ رات تقریباً 12:40 بجے اس وقت پیش آیا جب ایک آٹو گاڑی کو ایک دوسری گاڑی نے شالٹینگ سرینگر کے نزدیک ٹکر مار دی۔
عہدیدار نے بتایا کہ دونوں افراد کو فوری طور پر اسپتال منتقل کیا گیا، تاہم ان میں سے ایک شخص زخموں کی تاب نہ لاتے ہوئے صبح دم چل بسا۔
جاں بحق ہونے والے کی شناخت اعجاز احمد ڈار ولد عبدالرشید ڈار ساکن شاہ گنڈ، بانڈی پورہ کے طور پر ہوئی ہے، جبکہ زخمی شخص محمد اشرف مُلا ولد عبدالسلام مُلا، بھی شاہ گنڈ، بانڈی پورہ سے تعلق رکھتا ہے۔
زخمی شخص اسپتال میں زیر علاج ہے اور اس کی حالت مستحکم بتائی جا رہی ہے۔
دریں اثنا، پولیس نے اس واقعے کی تحقیقات شروع کر دی ہیں ـ