بڈگام میں بیوی کو قتل کرنے کے معاملے میں شخص گرفتار

بڈگام// بڈگم پولیس نے بتایا کہ جمعہ کو پولیس تھانہ بڈگام کو ایک اطلاع ملی کہ 47 سالہ غلام محمد بٹ ولد سیف الدین بٹ ساکنہ نصراللہ بڈگام اپنی اہلیہ کی لاش کو دفن کرنے کی کوشش کر رہا ہے۔ جس کی پراسرار حالت میں موت ہو گئی تھی۔
انہوں نے بتایا کہ یہ اطلاع ملتے ہی پولیس تھانہ بڈگام کی پولیس پارٹی اس مکان پر پہنچی جہاں خاتون کی موت واقع ہوئی تھی اور خاتونکی موت کو مشکوک پایا۔ اسی مناسبت سے سینئر پولیس افسران جائے وقوعہ پر پہنچے اور معاملہ کا معائنہ کیا۔
لاش کا معائنہ کرنے پر متوفی خاتون کے گلے پر تشدد کے نشانات پائے گئے جس کے بعد پولیس نے قانونی کارروائی کے لیے لاش کو قبضے میں لے لیا۔
پولیس حکام نے بتایا کہ آج گورنمنٹ میڈیکل کالج سری نگر میں مجسٹریٹ کی موجودگی میں مناسب ویڈیو گرافی کی موجودگی میں لاش کا پوسٹ مارٹم کیا گیا۔ اس کے ساتھ ہی متوفی خاتون کے شوہر غلام محمد بھٹ کو پوچھ گچھ کے لیے حراست میں لے لیا گیا۔ مسلسل پوچھ گچھ کے دوران، ملزم نے اپنی بیوی کو گلا دبا کر قتل کرنے کا اعتراف کیا جس کی ابتدائی پوسٹ مارٹم رپورٹ کی تصدیق کے مطابق اس نے پہلے سے منصوبہ بندی کی تھی۔
انہوں نے بتایا کہ اس سلسلے میں مقدمہ پولیس سٹیشن بڈگام میں درج کیا گیا ہے اور تفتیش شروع کردی گئی ہے۔
ابتدائی تفتیش کے دوران کئی شواہد اکٹھے کیے گئے ہیں۔
واضح رہے کہ متوفی خاتون (35 سال) کا تعلق کولکتہ سے تھا اور اس نے 20 دن قبل ملزم سے شادی کی تھی۔