عظمیٰ ویب ڈیسک

جموں// جموں و کشمیر پولیس نے بدھ کے روز ایک 42 سالہ شخص کے قتل کا معاملہ حل کرنے کا دعویٰ کیا ہے جس کی دو دن قبل جموں صوبہ کے اودھم پور ضلع سے گلا کٹی لاش برآمد ہوئی تھی۔
پولیس ترجمان نے بتایا کہ اس سلسلے میں بسنت گڑھ کے رہنے والے بکرم کمار کو گرفتار کیا گیا۔ انہوں نے مزید کہا کہ تحقیقات کے دوران ملزم مقتول پورن چند کی بیوی کا عاشق نکلا۔
انہوں نے بتایا کہ بلوٹا اپرلا گاو¿ں کے رہنے والے پورن چند کی لاش پیر کے روز قریبی لاکھیرا نالہ سے برآمد ہوئی تھی، جس کے بعد قتل کا مقدمہ درج کیا گیا تھا۔
پولیس ترجمان نے بتایا کہ بکرم کمار نے جرم کا اعتراف کیا اور انکشاف کیا کہ مقتول کی اہلیہ کے ساتھ اس کے ناجائز تعلقات تھے، تاہم وہ (ملزم) 22 اکتوبر کو مقتول کی رہائش گاہ پر موجود تھا، جہاں ان کا جھگڑا ہوا، جس دوران ہاتھا پائی میں پورن چند ہلاک ہو گیا۔
ترجمان کا مزید کہنا تھا کہ واردات میں استعمال ہونے والا ہتھیار بھی برآمد کر لیا گیا ہے۔معاملے کی مزید تحقیقات جاری ہیں۔