لیفٹیننٹ گورنر نے جموں و کشمیر میں بجلی کی صورتحال کاجائزہ لیا

جموں//لیفٹیننٹ گورنر منوج سِنہا نے آج سول سیکرٹریٹ میں جموںوکشمیرمیں بجلی کی صورتحال کا جائزہ لینے کے لئے ایک اعلیٰ سطحی میٹنگ کی صدارت کی۔
لیفٹیننٹ گورنر نے موسم گرمامیں بجلی کی زیادہ مانگ کو پورا کرنے کے لئے کثیر الجہتی حکمت عملی کی تعریف کی اور پاور سیکٹر کو مضبوط بنانے کے لئے اِصلاحات کو مربوط کرنے کی ہدایت دی۔
اُنہوں نے بجلی کی چوری ، غلط میٹرنگ ، عوامی شکایات کی انکوائری ، لوڈ میں غیر مجاز توسیع اور سر پرائز چیکنگ کا پتہ لگانے کے لئے ایک انفورسمنٹ وِنگ کے ذریعے موثر عمل آوری کی ہدایت دی ۔
لیفٹیننٹ گورنر نے 11 کے وِی پر تمام میٹروں کے کام کو یقینی بنانے کے لئے فوری اَقدامات کرنے اور ایک ماہ کے اَندر خراب میٹروں کی مرمت کرنے کی ہدایت دی۔
اُنہوں نے کہا کہ صارفین کے مفادات اور معیار کے تحفظ کے لئے سمارٹ میٹروں کو فیڈر وائزہونا چاہیے ۔ اُنہوں نے کہا کہ یہ صارفین کوبااِختیار بنائے گا اور توانائی اور اِستعمال کو موثر اَنداز میں محفوظ کرنے میں ان کی مدد کرے گا۔
لیفٹیننٹ گورنر اے ٹی اینڈ سی نقصانات کو کم کرنے کے لئے اُٹھائے گئے اقدامات کی رِپورٹ بھی طلب کی ۔ اُنہوں نے محکمہ کو مزید ہدایت دی کہ وہ ذمہ داری کا تعین کرے اور ایک مخصوص ٹائم فریم کے اَندر نقصانات کو کم کرنے کے لئے ایکشن پلان تیا ر کرے۔
اُنہوں نے پی ڈی ڈی کے عملے کی تربیت اور صلاحیت سازی ،نئے صارفین کی آن لائن رجسٹریشن ، بڑے پیمانے پر بیداری مہم ، بجلی کے بنیادی ڈھانچے کی مناسب دیکھ ریکھ اور آلات کی نگرانی کے لئے اَفسران کی ٹیموں کی تشکیل پر زور دیا۔
لیفٹیننٹ گورنر نے نئی صنعتی اسٹیٹس اور ریلوے ٹنلوں کو بجلی کی فراہمی کو یقینی بنانے کے لئے ہدایات جاری کیں۔
اُنہوں نے کوالٹی کنٹرول کے لئے اُٹھائے گئے اَقدامات، رُکے ہوئے منصوبوں کی تکمیل ، محصولات کی وصولی اور نیٹ ورک کو مضبوط کرنے کا بھی جائزہ لیا ۔
پرنسپل سیکرٹری پاور ڈیولپمنٹ ڈیپارٹمنٹ راجیش پرساد نے ڈیمانڈ اورسپلائی کے تفاوت کو ختم کرنے کے لئے کئے گئے موثر اَقدامات کے بارے میں چیئر کو جانکاری دی۔
میٹنگ میں بتایا گیا کہ موسم سرما کے دوران ڈیمانڈ کی سطح کو پورا کرنے کے لئے اِضافی صلاحیتیں پیدا کی گئیں اور گزشتہ برس کے مقابلے میں 10فیصد زیادہ بجلی فراہم کی گئی ۔
میٹنگ میں چیف سیکرٹری ڈاکٹر ارون کمار مہتا ، لیفٹیننٹ گورنر کے پرنسپل سیکرٹری ڈاکٹر مندیپ کمار بھنڈاری ، منیجنگ ڈائریکٹر جے پی ڈی سی ایل شیو اننت طائل ، منیجنگ ڈائریکٹر کے پی ڈی سی ایل چودھری محمد یاسین ، چیف اِنجینئروں اور سینئر اَفسران نے ذاتی طور پر اور بذریعہ ورچیول موڈ شرکت کی۔