عظمیٰ ویب ڈیسک
سری نگر/سری نگر کے نوہٹہ میں واقع تاریخی جامع میں رمضان المبارک سے قبل روشنیوں کی تنصیب اور عمارت کے اگلے حصے کو روشن کرنے کے ایک خصوصی منصوبے پر کام کیا جا رہا ہے جس کو رمضان سے قبل ہی مکمل کیا جائے گا۔جامع مسجد میں خواتین کے لئے نماز کی ادائیگی کو بہتر بنانے کے لئے مسجد کے خواتین سیکشن میں خصوصی آڈیو۔ ویڈیو آلات بھی نصب کئے جا رہے ہیں۔
انجمن اوقاف جامع مسجد نے بدھ کے روز اپنے ایک بیان میں کہا کہ مقدس ماہ رمضان المبارک کے پیش نظر انجمن اوقاف جامع مسجد کے اراکین، عملے اور رضاکاروں کا ایک اہم اجلاس انجمن اوقاف جامع مسجد کے سربراہ میر واعظ کشمیر مولوی محمد عمر فاروق کی صدارت میں منعقد ہوا۔
اجلاس کے دوران میرواعظ نے اس بابرکت مہینے میں اللہ تعالیٰ سے تعلق مضبوط کرنے کی اہمیت پر زور دیا۔انہوں نے کہا کہ جامع مسجد ہر سال رمضان المبارک میں لاکھوں عقیدت مندوں کی زیارت گاہ بنتی ہے اس لیے تمام انتظامات، خاص طور پر صفائی کا خاص خیال رکھا جانا چاہیے۔انہوں نے اس بات پر بھی زور دیا کہ بجلی اور پانی کی بلا تعطل فراہمی، ٹریفک کے موثر انتظام اور دیگر بنیادی سہولیات کو یقینی بنایا جانا چاہئے اور اس سلسلے میں انہوں نے اوقاف کو متعلقہ حکام سے رابطہ کرنے کی ہدایت دی۔
میرواعظ نے اس مقدس مہینے میں نوجوانوں کو بھی آگے بڑھ کر ان انتظامات میں حصہ لینے کی ترغیب دی اور کہا کہ مسجد کی خدمت کرنا اور ان کوششوں کا حصہ بننا بھی عبادت میں شمار ہوتا ہے اور اس کا بہت بڑا ثواب ہے۔
بیان کے مطابق انجمن اوقاف جامع مسجد کی انتظامیہ جامع مسجد میں رمضان المبارک سے قبل روشنیوں کی تنصیب اور عمارت کے اگلے حصے کو روشن کرنے کے ایک خصوصی منصوبے پر کام کر رہی ہے جو رمضان سے پہلے مکمل کر لیا جائے گا۔انہوں نے کہا کہ جامع مسجد میں خواتین کے لئے نماز کی ادائیگی کو بہتر بنانے کے لئے مسجد کے خواتین سیکشن میں خصوصی آڈیو۔ ویڈیو آلات بھی نصب کئے جا رہے ہیں۔اجلاس میں عوام سے اپیل کی گئی کہ وہ انجمن اوقاف جامع مسجد کی ان کاوشوں میں بھرپور حصہ لیں تاکہ رمضان المبارک بابرکت اور خوشگوار انداز میں گزارا جا سکے۔
