آسمانی بجلی گرنے و طوفانی آندھی کا قہر ،بکروال کی موت، متعدد بھڑیں ہلاک ،کئی مکانات کی چھتیں اُڑ گئیں

عاصف بٹ
کشتواڑ/منگل کی دیررات کشتواڑ ضلع بھر میں تیز آندھی و آسمانی بجلی گرنے سے متعدد مقامات پر نقصان ہواہے۔ کشتواڑ ضلع کے سب ڈویژن چھاترو میں آسمانی بجلی گرنے سے ایک بکروال کی موت ہوگئی اور اس کی متعدد بھیڑیں ہلاک ہوئی ہیں۔
تفصیلات کےمطابق سنتھن میدان میں خانہ بدوش بکروال اپنے مال مویشیوں کے ساتھ موجود تھا اِس دوران آسمانی بجلی آگری جس کی زد میں آکر ایک بکروال جاں بحق ہوگیا۔متوفیکی شناخت آزاد احمد ولد مہوالی کے طور ہوئی ہے ۔
عینی شاہدین نے بتایا کہ آسمانی بجلی گرنے سے آزاد احمد موقع پر ہی دم توڑ گیا۔ اس کے علاوہ اس کی کئی بھیڑیں بھی آسمانی بجلی گرنے سے ہلاک ہوئی ہیں جبکہ بھاری تعداد میں مال مویشی شدید زخمی ہو گیا۔آزاد احمد اپنے خاندان کا واحد کمانے والا تھا اور مال مویشیوں کے اسکا ذرئع معاش تھا۔
واقعہ کی اطلاع ملتے ہی مقامی انتظامیہ اور پولیس موقع پر پہنچ گئی۔ پولیس نے متوفی کی نعش کو پوسٹ مارٹم کے لیے تحویل میں لے لیا ہے جبکہ حکام نے محکمہ حیوانات کو نقصانات کا جائزہ لینے کی ہدایت کی ہے۔
آسمانی بجلی گرنے اور تیز آندھی نے جہاں جنگلوں میں قیام پذیر خانہ بدوشوں پر قہر ڈھایا ہے وہیں میدانی علاقوں میں بھی مکانات کے چھتیں اُڑ گئی ہیں ، معتدد مقامات پر مکانات کو بھاری پیمانے پر نقصان کی اطلاع موصول ہورہی ہے۔ جبکہ کئی جگہوں پر درخت سڑکوں پر گرآئے ہیں ۔حکام نقصان کا پتہ لگانے میں مصروف ہے ۔