عظمیٰ ویب ڈیسک
سرینگر/جموں و کشمیر کے ضلع کشتواڑ کے دورافتادہ گاؤں چسوتی میں جمعرات کو بادل پھٹنے اور اس کے نتیجے میں آنے والے تباہ کن فلیش فلڈ نے ہولناک تباہی مچا دی، جس میں اب تک کم از کم 60 افراد جاں بحق، 120 سے زائد زخمی اور 70 لاپتہ ہو گئے ہیں۔ حکام کے مطابق مزید افراد کے ملبے تلے دبے ہونے کا خدشہ ہے۔
وزیر اعظم نریندر مودی نے جمعہ کو وزیر اعلیٰ عمر عبداللہ اور لیفٹیننٹ گورنر منوج سنہا سے فون پر بات کر کے صورتِ حال کا جائزہ لیا اور ہر ممکن مرکزی امداد فراہم کرنے کا یقین دلایا۔ وزیر اعظم نے ایکس (سابقہ ٹوئٹر) پر لکھا کہ حکام متاثرہ افراد کی مدد کے لیے زمینی سطح پر کام کر رہے ہیں۔
وزیر اعلیٰ عمر عبداللہ نے سری نگر کے بخشی اسٹیڈیم میں یوم آزادی کی تقریب سے خطاب میں بتایا کہ ہلاک شدگان میں دو سی آئی ایس ایف اہلکار بھی شامل ہیں۔ انہوں نے کہا کہ یہ سانحہ ریاست کے لیے ایک بڑے المیے سے کم نہیں۔
ضلع انتظامیہ کے مطابق اب تک 160 سے زائد افراد کو بچایا جا چکا ہے جن میں سے 38 کی حالت تشویش ناک ہے۔ متاثرہ علاقے میں کنٹرول روم اور ہیلپ ڈیسک قائم کر دیا گیا ہے، جہاں سے لاپتہ افراد کی تلاش اور متاثرہ خاندانوں کو مدد فراہم کی جا رہی ہے۔
کشتواڑ سانحہ: 60 ہلاکتیں، 70 لاپتہ، 120 سے زائد زخمی، وزیر اعظم مودی نے ہر ممکن مدد کی یقین دہانی کرائی
