عظمیٰ ویب ڈیسک

سرینگر// اگست 2019 میں دفعہ 370 کی منسوخی کے بعد وادی کشمیر کے اپنے پہلے دورے کے دوران وزیرِ اعظم نریندر مودی نے سرینگر کے بخشی سٹیڈیم میں ایک عوامی ریلی سے خطاب کرتے ہوئے کہا جموں و کشمیر بھارت کا تاج ہے۔
وزیر اعظم نے کہا کہ جموں و کشمیر بھارت کا سیاحتی مرکز بن گیا ہے۔ انہوں نے وضاحت کی کہ کس طرح حکومت ‘چلو انڈیا’ پہل کے ساتھ اس علاقے میں سیاحت کو فروغ دینے کی کوشش کر رہی ہے۔ انہوں نے مزید کہا کہ 40 تازہ مقامات کی نشاندہی کی گئی ہے جو سیاحوں کے دیکھنے کیلئے تیار کیے جائیں گے۔
انہوں نے کہا کہ حکومت مرکز کے زیر انتظام علاقے کی ترقی کے لیے کام کر رہی ہے اور اس نے کاروبار، زراعت اور کھیلوں سمیت مختلف شعبوں میں خطے کے نوجوانوں کی کامیابیوں کو اجاگر کیا۔
وزیرِ اعظم مودی نے ‘وکشت بھارت، جموں کشمیر’ پروگرام میں حصہ لیا اور آئندہ لوک سبھا انتخابات سے قبل سری نگر کے دورے کے دوران 6,400 کروڑ روپے سے زیادہ کے متعدد ترقیاتی پروجیکٹوں کی نقاب کشائی کی۔ انہوں نے نئے سرکاری بھرتیوں میں آفر لیٹر بھی تقسیم کئے۔
وزیر اعظم نے مقامی کاروباریوں سے بات چیت کی، جنہوں نے وزیر اعظم کو اپنے سفر کے دوران مرکز سے ملنے والی مدد کے بارے میں آگاہ کیا۔
جموں و کشمیر کے لیفٹیننٹ گورنر منوج سنہا نے پی ایم مودی کا خیرمقدم کرتے ہوئے کہا، “جموں و کشمیر کے لوگوں کی طرف سے، میں سری نگر میں پی ایم مودی کا استقبال کرتا ہوں۔ پچھلے 10 سالوں میں جموں و کشمیر کی ترقی پی ایم مودی کی ترجیح رہی ہے۔ آج مرکز کے زیر انتظام علاقہ فخر سے جگمگا رہا ہے۔ پچھلی تین دہائیوں سے وادی کشمیر کو دہشت گردی اور ناانصافی نے لہو لہان کیا اور آج آپ کی قیادت میں یہاں امن اور ترقی کا پرچم بلند ہے۔
انہوں نے ان لوگوں سے معذرت بھی کی جنہیں زیادہ بھیڑ کی وجہ سے بیٹھنے کی جگہ نہیں ملی۔