جموں کشمیر کا ریاستی درجہ مناسب وقت پر بحال کیا جائے گا ، مرکز اس کیلئے وعدہ بند :منوج سنہا

عظمیٰ ویب ڈسک
سرینگر/جموں کشمیر کا ریاستی درجہ مناسب وقت پر بحال ہوگا کی بات کرتے ہوئے لیفٹنٹ گورنر منوج سنہا نے کہا کہ وزیر اعظم مودی کی قیادت میں پچھلے پانچ سالوں میں بڑی تبدیلیاں آئی ہیں۔ چھ سالوں میں معیشت دوگنی ہو گئی ہے۔ نوجوانوں کو خود روزگار فراہم کیا گیا ہے۔انہوں نے کہا کہ ہم نے دیہات میں خدمت مراکز بنائے ہیں۔ صنعت کی طرف سے سرمایہ کاری کی گئی ہے۔
این ڈی ٹی وی کے ساتھ ایک خصوصی انٹرو یو میں لیفٹنٹ گورنر منوج سنہا نے کہا کہ جموں و کشمیر کو ریاست کا درجہ ملے گا تاہم اس کیلئے مناسب وقت کا انتظار کریں۔ انہوں نے کہا کہ جموں کشمیر کے ریاستی درجہ کی بحالی کا وعد ہ وزیر اعظم نریندر مودی اور وزیر داخلہ امیت شاہ نے پارلیمنٹ میں کیا ہے اور مناسب وقت آنے پر اس کو بحال کیا جائے گا ۔انٹرویو کے دوران جموں کشمیر کے ترقیاتی سفر پر بات کرتے ہوئے لیفٹنٹ گورنر منوج سنہا نے کہا کہ وزیر اعظم مودی کی قیادت میں جموں و کشمیر میں 1.5 لاکھ کروڑ روپے کے بنیادی ڈھانچے کے منصوبے مکمل ہوئے ہیں جن میں آئی آئی ٹی، آئی آئی ایم اور میڈیکل کالج شامل ہیں۔
پچھلے چار سالوں میں سیاحت کے شعبے میں بہت ترقی ہوئی ہے، دو کروڑ سے زیادہ سیاح آئے ہیں اور 50 ہزار کروڑ روپے کی سرمایہ کاری ہوئی ہے۔ دہشت گردی کے متاثرین کو سرکاری ملازمتیں اور مالی امداد فراہم کی گئی ہے، اس سال چالیس افراد کو روزگار ملا ہے۔انہوں نے کہا ’’ پچھلے کچھ سالوں میں جموں و کشمیر میں بہت کچھ بدل گیا ہے۔
وزیر اعظم مودی کی قیادت میں جموں و کشمیر میں 1.5 لاکھ کروڑ روپے کے بنیادی ڈھانچے کے منصوبے ہیں۔ جہلم ریور فرنٹ بنایا گیا ہے۔ تعلیمی ادارے کھل گئے۔ آئی آئی ٹی، آئی آئی ایم اور نئے میڈیکل کالج بنائے گئے۔ دو ایمز بھی قائم کیے گئے تھے، پی ایم نے اسے منصوبہ بند طریقے سے قائم کیا ہے۔ ‘‘ منوج سنہا نے کہا کہ پچھلے سال دو کروڑ اڑتیس لاکھ سیاح آئے تھے۔ جن کے پاس ایک ہوٹل تھا، اب دو ہوٹل ہیں۔ پچھلے چار سالوں میں پانچ ہزار نئے ہوٹل بنائے گئے۔ پچاس ہزار کروڑ کی سرمایہ کاری ہوئی۔
لاکھوں لوگوں کو روزگار ملا۔انہوں نے کہا کہ پہلے ایک بیانیہ چلایا جاتا تھا۔ تشدد میں مارے جانے والے دہشت گردوں کو دفنانے کی جگہ نہیں دی گئی اور دہشت گردوں کے لیے جلوس نکالے گئے۔ ایک متاثرہ خاندان میں بڑے بیٹے کو نوکری مل گئی لیکن دیگر افراد کو نہیں ملی۔ ہم نے آپس میں بحث کی۔ وزیر داخلہ سے بات ہوئی۔ ہم نے ان کا مسئلہ سمجھنے کی کوشش کی۔منوج سنہا نے کہا ’’ ایک لڑکی نے بتایا کہ اس کے والد ایس پی او تھے، جنہیں دہشت گردوں نے قتل کر دیا۔ اسے بھیک مانگنی پڑی۔ قاتل کو سرکاری نوکری مل گئی۔
ہم نے سینئر حکام کے ساتھ میٹنگ کی۔ ایس آر او 43 ہے جس میں دہشت گردی کے متاثرین کو سرکاری ملازمتیں دینے کا ویژن ہے۔ ہم نے مالی مدد کے امکانات کا جائزہ لیا‘‘۔ منوج سنہا نے مزید کہا کہ بہت سے لوگوں کے خلاف ایف آئی آر درج نہیں کی گئی۔ دہشت گردوں نے کئی لوگوں کی املاک ہتھیا لی تھیں۔ آج 40 لوگوں کو نوکریاں دی گئیں۔ آج کشتواڑ اور رام بن کے لوگوں کو بھی تقرری خط دیے گئے۔ یہ پورے جموں و کشمیر کے ہر ضلع میں دیا جائے گا۔ انہیں انصاف ملنا چاہیے، کام کرنا چاہیے، ان کا وقار بحال ہونا چاہیے۔
انہوں نے کہا ’’ ب حالات بدل چکے ہیں۔ وزیر داخلہ کا کہنا ہے کہ صرف دہشت گردوں کو نہیں بلکہ پورے ایکو سسٹم کو ختم کرنا ہوگا۔ جو کافی حد تک ختم ہو چکا ہے‘‘۔منوج سنہا نے کہا ’’پہلگام حملے کے بعد عوام پاکستان کے خلاف ہے۔ ‘‘ انہوں نے یہ بھی کہا کہ نتائج آنا شروع ہو گئے ہیں۔ 22 اپریل کے واقعے کے بعد جس طرح سے عوام پاکستان اور دہشت گردی کے خلاف اٹھ کھڑے ہوئے۔ میں نے 5 سال میں ایسا کچھ نہیں دیکھا۔ بہت سے لوگوں نے کہا کہ ہم نے 50 سال میں ایسا منظر نہیں دیکھا۔ یہ اپنے آپ ہی ہوا۔ کوئی کریڈٹ نہیں لے سکتا۔
حالات معمول پر آچکے ہیں۔پہلگام دہشت گردانہ حملے پر منوج سنہا نے کہا کہ پہلگام حملہ صرف ایک جھٹکا نہیں تھا۔ یہ ہندوستان کی روح پر حملہ تھا۔ قتل و غارت اور بھرتیوں میں بڑی تبدیلی آئی ہے۔ وہاں 150مقامی دہشت گرد ہوا کرتے تھے۔ اس سال اب تک صرف ایک کو بھرتی کیا گیا ہے۔ مقامی لوگ پاکستان سے مایوس ہو چکے ہیں۔انہوں نے کہا ’’بدقسمتی سے ہمیں ایک ایسا پڑوسی ملا جس کی ریاستی پالیسی دہشت گردی کو فروغ دینا ہے۔ پہلگام دہشت گردانہ حملہ ایک سوچی سمجھی سازش تھی۔ این آئی اے کی تحقیقات سے پتہ چلا کہ وہ پاکستانی دہشت گرد تھے۔ ان کی عمر لمبی نہیں ہوتی‘‘۔انہوں نے مزید کہا کہ آپریشن سندور نے پاکستان کو سبق سکھایا۔ منوج سنہا نے کہا کہ وزیراعظم نے کہا ہے کہ دہشت گردی کے واقعے کو جنگ تصور کیا جائے گا، یہ بڑا پیغام ہے۔