جامع مسجد سری نگر میں فوٹوگرافی، مرد اور خواتین کے ایک ساتھ بیٹھنے پر پابندی

سری نگر//سرینگر کی تاریخی جامع مسجد کی انتظامیہ نے ایک نوٹیفکیشن جاری کرتے ہوئے مسجد کے اندر فوٹوگرافی پر پابندی عائد کر دی ہے اور مردوں اور خواتین کو مسجد کے لان میں ایک ساتھ نہ بیٹھنے کو کہا گیا ہے۔
انجمن اوقاف مرکزی جامع مسجد نے مسجد احاطے کے چاروں طرف لگائے گئے نوٹیفکیشن میں کہا ہے کہ مسجد کے اندر فوٹو گرافی کے آلات کا داخلہ بھی ممنوع ہے۔
اس میں لکھا گیا ہے کہ “فوٹوگرافرز یا کیمرہ پرسن کو مسجد کے اندر کسی بھی قسم کی تصاویر لینے یا کلک کرنے کی ممانعت ہے۔ حتیٰ کہ کسی بھی قسم کی تصاویر کو کلک کرنے کے لیے استعمال ہونے والے آلات کی بھی مکمل طور پر اجازت نہیں ہے اور انہیں فوری طور پر گیٹ پر روکا جائے گا”۔
اشتہار میں کہا گیا ہے ، “مسجد کے اندر کسی کو دوپہر کا کھانا یا کسی بھی قسم کے کھانے پینے کی اجازت نہیں ہے، اس لیے زائرین کو گیٹ پر ہی روکا جائے گا”۔
۔14ویں صدی کی مسجد کی انتظامیہ نے اپنے سیکیورٹی گارڈز کو کہا ہے کہ وہ ان ہدایات پر فوری عمل درآمد کریں۔