میرواعظ عمر فاروق کو مذہبی فرائض کی ادائیگی سے روکنا ناقابل فہم: محبوبہ مفتی

عظمیٰ ویب ڈیسک
سری نگر/پیپلز ڈیموکریٹک پارٹی کی صدر اور سابق وزیر اعلیٰ محبوبہ مفتی نے میرواعظ عمر فاروق کی ایک بار پھر نظر بندی پر شدید ردعمل ظاہر کرتے ہوئے اسے انتظامیہ کی من مانی قرار دیا ہے۔محبوبہ مفتی نے اپنے ایک بیان میں کہا’ایک بار پھر، میرواعظ صاحب کو گھر میں نظر بند کر دیا گیا ہے۔ یہ اب ایک معمول بن چکا ہے کہ انہیں مذہبی فرائض انجام دینے سے روکا جاتا ہے۔‘
محبوبہ مفتی نے کہا کہ مذہبی آزادی ہر شہری کا بنیادی حق ہے اور میرواعظ کو بار بار نظر بند کرنا نہ صرف ان کے اس حق کی خلاف ورزی ہے بلکہ کشمیری مسلمانوں کے مذہبی جذبات کو بھی مجروح کرتا ہے۔انہوں نے انتظامیہ سے مطالبہ کیا کہ وہ فوری طور پر میرواعظ کی نظر بندی ختم کرے اور انہیں اپنے مذہبی فرائض کی آزادانہ ادائیگی کی اجازت دی جائے۔دوسری جانب انتظامیہ کی جانب سے تاحال میرواعظ کی نظر بندی سے متعلق کوئی باضابطہ بیان جاری نہیں کیا گیا ہے۔