سری نگر//جموں و کشمیر نیشنل کانفرنس کے صدر اور سابق وزیراعلیٰ ڈاکٹر فاروق عبداللہ نے ایران پر اسرائیلی حملے کی شدید مذمت کرتے ہوئے اسے عالمی قوانین اور اصولوں کی صریح خلاف ورزی قرار دیا ہے۔ انہوں نے اس جارحیت کو ناقابلِ قبول، غیر انسانی اور خطرناک عمل قرار دیتے ہوئے عالمی برادری کی خاموشی پر افسوس کا اظہار کیا۔
اپنے ایک بیان میں ڈاکٹر فاروق عبداللہ نے کہا،’اسرائیلی جارحیت نہ صرف ایران کی خودمختاری اور سالمیت کے لیے خطرہ ہے بلکہ یہ بین الاقوامی قوانین کی کھلی خلاف ورزی ہے۔ اسرائیل مکمل طور پر بے لگام ہو چکا ہے اور فلسطین میں ظلم و ستم کی تمام حدیں پار کر چکا ہے۔‘انہوں نے کہا کہ اقوام متحدہ کی خاموشی تشویشناک ہے، جو گزشتہ ایک سال اور آٹھ ماہ سے جاری اسرائیلی بمباری پر محض رسمی بیانات جاری کر کے اپنی ذمہ داریاں نبھانے میں پوری طرح سے ناکام ثابت ہو چکا ہے۔
ڈاکٹر فاروق عبداللہ نے احمد آباد میں پیش آئے افسوسناک طیارہ حادثے پر بھی گہرے رنج و غم کا اظہار کیا، جس میں درجنوں قیمتی جانیں ضائع ہو گئیں۔ انہوں نے سوگوار خاندانوں سے دلی تعزیت اور ہمدردی کا اظہار کرتے ہوئے مرحومین کے لیے دعائے مغفرت کی۔انہوں نے کہا:’مجھے احمد آباد میں ہوائی جہاز کے حادثے کی خبر سے گہرا صدمہ پہنچا ہے۔ میرے خیالات اور دعائیں اُن تمام خاندانوں کے ساتھ ہیں جنہوں نے اپنے عزیزوں کو کھو دیا ہے۔ خدا ان متاثرہ خاندانوں کو اس ناقابل تلافی نقصان کو برداشت کرنے کی ہمت عطا فرمائے۔‘ڈاکٹر فاروق عبداللہ نے حکومت اور متعلقہ اداروں پر زور دیا کہ وہ اس کٹھن وقت میں متاثرہ خاندانوں کے ساتھ عملی یکجہتی کا مظاہرہ کریں اور ہر ممکن امداد فراہم کریں ـ
