فلسطین میں انسانی بحران اور اسرائیلی بربریت دنیا کے لیے چیلنج: یوسف تاریگامی

عظمیٰ ویب ڈیسک
سری نگر/کمیونسٹ پارٹی آف انڈیا (مارکسسٹ) کے سینئر رہنما یوسف تاریگامی نے منگل کے روز کہا ہے کہ فلسطین میں جاری انسانی بحران اور ایران و فلسطین میں اسرائیل کی جانب سے ڈھائی جانے والی بربریت نہ صرف عالمی امن کے لیے خطرہ ہیں بلکہ پوری دنیا کے لیے ایک اخلاقی چیلنج بھی بن چکے ہیں۔
تاریگامی نے نامہ نگاروں سے بات چیت کے دوران کہا کہ فلسطین کے مظلوم عوام پر اسرائیل کی جانب سے مسلسل فضائی حملے، بمباری اور محاصرے نے وہاں انسانی زندگی کو جہنم بنا دیا ہے۔ اب ایران میں بھی شہری علاقوں اور تعلیمی اداروں کو نشانہ بنایا جا رہا ہے، جو بین الاقوامی قوانین اور انسانی حقوق کی کھلی خلاف ورزی ہے۔
یوسف تاریگامی نے اعلان کیا کہ سی پی آئی (ایم) اس صورتحال کے خلاف ملک گیر احتجاجی مظاہرے کرے گی، تاکہ عالمی برادری اور حکومت ہند پر دباؤ ڈالا جا سکے کہ وہ فلسطینی عوام کی حمایت میں اپنا مؤثر کردار ادا کریں۔
تاریگامی نے مرکزی حکومت کی خارجہ پالیسی پر بھی سوالات اٹھائے اور کہا کہ بھارت کو ہمیشہ غیر جانب دار، انصاف پسند اور انسان دوست موقف اختیار کرنا چاہیے، جیسا کہ پنڈت جواہر لال نہرو اور دیگر بانی رہنماؤں نے اپنایا تھا۔ان کے مطا بق یہ وقت ہے کہ بھارت اسرائیلی جارحیت کے خلاف کھل کر بولے اور فلسطین و ایران کے متاثرین کے حق میں انسانی بنیادوں پر آواز بلند کرے۔