جموں میں بلیک آؤٹ، فضائی حملے کے سائرن گونجنے لگے: عمر عبداللہ

عظمیٰ ویب ڈیسک
سری نگر/جموں و کشمیر کے وزیر اعلیٰ عمر عبداللہ کا کہنا ہے کہ جموں شہر میں مکمل بلیک آؤٹ نافذ کیا گیا ہے اور فضا میں سائرن گونج رہے ہیں۔
سماجی رابطے کی ویب سائٹ ‘ایکس’ پر عمر عبداللہ نے ایک پوسٹ میں لکھا:’جموں میں اب بلیک آؤٹ ہو چکا ہے۔ شہر بھر میں سائرن کی آوازیں سنائی دے رہی ہیں۔‘
ذرائع کے مطابق یہ دوسری رات ہے جب جموں میں بلیک آؤٹ نافذ کیا گیا ہے، جس کی وجہ ہندوستان اور پاکستان کے درمیان بڑھتی ہوئی سرحدی کشیدگی بتائی جا رہی ہے۔
مبصرین کا کہنا ہے کہ سائرن بجنے کا مطلب یہ ہو سکتا ہے کہ شہر کو کسی ممکنہ فضائی خطرے سے آگاہ کیا جا رہا ہے۔ تاہم، سرکاری سطح پر ابھی تک کوئی باقاعدہ بیان جاری نہیں کیا گیا ہے۔
دفاعی ماہرین کے مطابق، ایسے بلیک آؤٹ اور سائرن کے اقدامات عام طور پر کسی ہنگامی یا جنگی صورتِ حال سے قبل احتیاطی تدابیر کے طور پر اختیار کیے جاتے ہیں، تاکہ روشنیوں کی مدد سے ممکنہ دشمن حملوں کو روکا جا سکے۔
علاقے میں خوف و ہراس کی فضا ہے اور شہری گھروں میں محصور ہو چکے ہیں۔ مقامی انتظامیہ کی جانب سے عوام سے پرامن رہنے اور افواہوں سے بچنے کی اپیل کی جا رہی ہے۔