کپوارہ میں ایل او سی پر 2 ملی ٹینٹ جاں بحق، اسلحہ بر آمد: فوج

عظمیٰ ویب ڈیسک
سری نگر/فوج کا کہنا ہے کہ شمالی کشمیر کے ضلع کپوارہ کے مژھل سیکٹرمیں لائن آف کنٹرول (ایل او سی) پر در اندازی کی ایک ممکنہ کوشش کو ناکام بناکر 2 ملی ٹینٹ کو جاں بحق کر دیا گیا۔انہوں نے کہا کہ اس دوران بڑی مقدار میں اسلحہ و دیگر ساز و سامان بر آمد کیا گیا اور علاقے میں آپریشن جاری ہے۔فوج کی چنار کور نے ایکس پر ایک پوسٹ کے ذریعے جانکاری فراہم کرتے ہوئے کہا ’در اندازی کی ممکنہ کوشش کے بارے میں جموں وکشمیر کی طرف سے مخصوص انٹیلی جنس ان پٹ اور ذرائع اور ایجنسیوں کی طرف سے تصدیق کی بنیاد پر کپوارہ کے مژھل سیکٹر میں ایل او سی پر ایک مشترکہ آپریشن شروع کیا گیا‘۔
انہوں نے کہا ’مستعد جوانوں نے مشکوک نقل و حمل دیکھی اور اس کو چیلنج کیا جس کے نتیجے میں ملی ٹینٹوںنے اندھا دھند فائرنگ کی‘۔ان کا کہنا ہے کہ جوانوں نے موثر جوابی کارروائی کی جس کے نتیجے میں دو دہشت گردوں کو ہلاک کر دیا گیا۔پوسٹ میں مزید کہا گیا کہ بڑی مقدار میں اسلحہ و دیگر ساز و سامان بر آمد کیا گیا اور علاقے میں آپریشن ہنوز جاری ہے۔