عظمیٰ ویب ڈیسک
سری نگر/جموں وکشمیر کے پونچھ ضلع میں لائن آف کنٹرول (ایل او سی) کے ساتھ سرحد پار سے فائرنگ اور آئی ای ڈی حملے کے کئی حالیہ واقعات کے بعد کشیدگی کو کم کرنے کی خاطرجمعے کے روز ہند و پاک افواج کے مابین فلیگ میٹنگ منعقد ہوئی۔
اطلاعات کے مطابق پونچھ کے چکندا باغ کراسنگ پوائنٹ پر ہندوپاک افواج کے درمیان بریگیڈیر کمانڈر سطح کی فلیگ میٹنگ منعقد ہوئی جس دوران سرحد پر امن و امان کو برقرار رکھنے کی اہمیت پر زور دیا گیا۔ذرائع نے بتایا کہ جمعے کی صبح گیارہ بجے کے قریب یہ میٹنگ منعقد ہوئی جو ڈیڑھ گھنٹے تک جاری رہی۔
معلوم ہوا ہے کہ میٹنگ خوشگوار ماحول میں منعقد ہوئی اور دونوں طرفین نے سرحدوں پر امن کے وسیع تر مفاد میں جنگ بندی معاہدے کا احترام کرنے پر اتفاق کیا۔
باوثوق ذرائع کے مطابق لائن آف کنٹرول پر حالیہ سیز فائر معاہدے کی خلاف ورزیوں کا معاملہ بھی اٹھایا گیا جس دوران ہندوستان کے فوجی کمانڈر نے اپنے پاکستانی ہم منصب پر زور دیا کہ ایل او سی پر جنگ بندی معاہدے کا احترام ناگزیر ہے۔انہوں نے مزید بتایا کہ دونوں افواج نے لائن آف کنٹرول پر جنگ بندی معاہدے پر سختی کے ساتھ عمل پیرا ہونے پر اتفاق کر لیا ہے۔
یہاں یہ امر قابل ذکر ہے کہ 25فروری 2021کو دونوں ممالک کے درمیان معاہدے کی تجدید کے بعد لائن آف کنٹرول پر جنگ بندی کی خلاف ورزیاں شازو نادرہی ہوئی ۔گیارہ فروری 2025کو جموں کے اکھنور سیکٹر میں مشتبہ دہشت گردوں کی طرف سے کئے گئے دیسی ساخت کے آئی ای ڈی حملے میں فوجی کیپٹن سمیت دو اہلکار جاں بحق جبکہ ایک زخمی ہوا۔
دس اور 14فروری کو راجوری اور پونچھ اضلاع میں ایل او سی کے اس پار سے چھوٹے ہتھیاروں کا آزادانہ استعمال کیا گیا جس کے نتیجے میں دو اہلکار زخمی ہوئے جبکہ پونچھ میں گزشتہ ہفتے کے دوران الگ الگ باردوی سرنگوں کے دھماکوں میں دو فوجی شدید طورپر مضروب ہوئے۔
سال2021میں ہندو پاک افواج کے درمیان معاہدے کی تجدید کے بعد لائن آف کنٹرول پر امن و سکون واپس لوٹ آیا تاہم حالیہ دونوں پاکستانی رینجرس کی جانب سے ایل او سی پر سیز فائر معاہدے کی دھجیاں اڑائی گئی جبکہ سنائپر حملوں میں تین جوان زخمی بھی ہوئے ۔ناجنگ معاہدے کی خلاف ورزیوں کے بعد جمعے کے روز ہندوپاک افواج کے درمیان بریگیڈیر سطح کی بات چیت ہوئی جس دوران فیصلہ لیا گیا کہ جنگ بندی معاہدے پرعملدرآمد کو یقینی بنایا جائے گا۔
