بھارت کو بیرونی نہیں بلکہ اندرونی خطرات لاحق ہیں: فاروق عبداللہ

جموں// جموں و کشمیر کے سابق وزیر اعلیٰ اور نیشنل کانفرنس کے صدر فاروق عبداللہ نے بدھ کے روز کہا کہ بھارت کو کسی بیرونی خطرے کا سامنا نہیں بلکہ اصل خطرہ اندرونی مسائل سے ہے۔
انہوں نے ملک میں “ہندو خطرے میں ہیں” کے پروپیگنڈے کو سخت تنقید کا نشانہ بنایا۔
جموں میں پارٹی کارکنان سے خطاب کرتے ہوئے فاروق عبداللہ نے کہا، “آج بھی ہمارا ملک ہم سے قربانیاں طلب کرتا ہے تاکہ ہم اپنی آزادی کی حفاظت کر سکیں۔ اگر ہم اس میں ناکام رہے تو ہندوستان کو محفوظ رکھنا ممکن نہیں ہوگا۔ بھارت کو کوئی بیرونی خطرہ لاحق نہیں بلکہ خطرہ اندر سے ہے”۔
انہوں نے مزید کہا کہ ہمیشہ اندرونی عناصر ہی کسی گھر کو نقصان پہنچاتے ہیں، نہ کہ باہر کے لوگ۔ “اگر ہمیں اپنے گھر کو مضبوط بنانا ہے تو ہمیں اپنی صفوں کو مضبوط کرنا ہوگا۔ عوام کے درمیان جا کر ان کے مسائل کو سمجھنا اور ان کے حل تلاش کرنا ضروری ہے”۔
فاروق عبداللہ نے کہا، “یہ پروپیگنڈہ کہ ہندو خطرے میں ہیں، بے بنیاد ہے۔ میں سوال کرتا ہوں کہ جب ہندو ملک کی 80 فیصد آبادی پر مشتمل ہیں تو یہ دعویٰ کیسے درست ہو سکتا ہے؟ یہ پروپیگنڈہ صرف خوف پیدا کرنے کے لیے کیا جا رہا ہے”۔
انہوں نے دفعہ 370 کی منسوخی پر روشنی ڈالتے ہوئے کہا کہ جموں میں ملازمتوں کے مواقع مقامی لوگوں کے بجائے بیرونِ ریاست سے آنے والے افراد کو فراہم کیے جا رہے ہیں۔
انہوں نے کہا، “دفعہ 370 کا مقصد صرف کشمیری عوام نہیں بلکہ ڈوگرہ برادری کے حقوق کا تحفظ بھی تھا، لیکن آج صورتحال یہ ہے کہ یہاں کے ملازمت کے مواقع غیر مقامی افراد کو دیے جا رہے ہیں”۔
نیشنل کانفرنس پر لگائے گئے الزامات کا جواب دیتے ہوئے فاروق عبداللہ نے کہا، “ہماری جماعت کے رہنماؤں، جو مسلمان ہیں، پر الزامات لگائے گئے اور انہیں پاکستانی قرار دیا گیا۔ لیکن 75 سال کے بعد عوام یہ جان چکے ہیں کہ نیشنل کانفرنس واقعی عوام کی نمائندہ جماعت ہے”۔
انہوں نے پی ڈی پی کو دفعہ 370 کی منسوخی کا ذمہ دار ٹھہراتے ہوئے کہا، “میں نے مفتی محمد سعید کو بی جے پی کے ساتھ اتحاد نہ کرنے کی تجویز دی تھی لیکن انہوں نے اسے نظرانداز کیا، جس کا نتیجہ دفعہ 370 کی منسوخی کی صورت میں سامنے آیا”۔
کانگریس کے ساتھ نیشنل کانفرنس کے تعلقات پر گفتگو کرتے ہوئے فاروق عبداللہ نے کہا، “کانگریس ہم سے اور کیا چاہتی ہے؟ ہم ان کا مکمل احترام کر رہے ہیں۔ جموں و کشمیر کی موجودہ حکومت اپنی پالیسیوں کے تحت جاری رہے گی اور کوئی اس پر اپنی شرائط مسلط نہیں کر سکتا”۔