عظمیٰ ویب ڈیسک

سرینگر// محکمہ موسمیات کا کہنا ہے کہ جموں و کشمیر میں موسم رواں ماہ کی آخر تک گرم اور مرطوب رہنے کا امکان ہے تاہم اس دوران کوئی خاص موسمی سرگرمی متوقع نہیں ہے۔
محکمہ موسمیات کے ترجمان نے کہا کہ 21 سے 26 جولائی تک کشمیر صوبہ کے الگ تھلگ مقامات پر بارش اورجموں صوبہ کے وسیع مقامات پر گرج چمک کے ہلکی بارش اور جزوی طور پر مطلع ابر آلود رہنے کا امکان ہے۔
انہوں نے کہا کہ 27 سے 31 جولائی تک جموں و کشمیر کے کئی مقامات پر ہلکی سے درمیانی بارش اور گرج چمک کے ساتھ وقفے وقفے سے ابر آلود موسم کا امکان ہے۔ انہوں نے کہا کہ جموں صوبہ کے چند حساس مقامات پر لینڈ سلائیڈنگ، مٹی کے تودے گرنے اور پتھراو کے امکان کے ساتھ مختصر مدت کے لیے شدید بارش کی بھی پیش گوئی کی گئی ہے۔
انہوں نے مزید کہا کہ 26 جولائی تک جموں و کشمیر میں مجموعی طور پر گرم اور مرطوب موسم متوقع ہے۔