وزیر داخلہ جموں سے پونچھ روانہ

عظمیٰ ویب ڈیسک
سرینگر/مرکزی وزیر داخلہ امیت شاہ جموں سے پونچھ کے لئے روانہ ہوئے جہاں وہ حالیہ پاکستانی گولہ باری سے متاثرہ کنبوں کے ساتھ ملاقات کریں گے۔وزیر داخلہ گذشتہ شب جموں پہنچے جہاں انہوں نے ایک اعلیٰ سطحی سیکورٹی جائزہ اجلاس کی صدارت کی جس میں جموں و کشمیر کے لیفٹیننٹ گورنر منوج سنہا اور دیگر اعلیٰ سیکورٹی و سول حکام نے شرکت کی۔
انہوں نے جمعہ کی صبح’ایکس‘پر اپنے ایک پوسٹ میں کہاا مرناتھ یاترا کے حوالے سے سیکیورٹی انتظامات کا جائزہ لیا۔ تمام متعلقہ ایجنسیوں کو ہدایت دی گئی ہے کہ وہ زیادہ سے زیادہ چوکسی اختیار کریں اور یاترا کو محفوظ و آسان بنانے میں کوئی کوتاہی نہ کریں۔ذرائع کے مطابق وہ پونچھ میں حالیہ پاکستانی گولہ باری سے متاثرہ کنبوں کے ساتھ ملاقات کریں گے۔
انہوں نے کہا کہ اس دوران وہ سنگھ سبھا گوردوارہ سمیت تباہ شدہ مذہبی مقامات کا بھی دورہ کریں گے اور سب سے زیادہ متاثرہ اس ضلع میں نقصان کا جائزہ لینے کے لیے افسران کے ساتھ میٹنگ کریں گے۔ان کا کہنا ہے کہ وزیر داخلہ پونچھ میں بی ایس کیمپ کا بھی دورہ کریں گے جہاں وہ جوانوں کے ساتھ بات چیت بھی کریں گے۔
انہوں نے کہا کہ وہ پونچھ میں ڈاک بنگلہ میں پاکستانی گولہ باری سے متاثرہ شہریوں اور خانیتر میں ان کے یونٹ ہیڈ کوارٹر میں بی ایس ایف کے جوانوں سے بھی خطاب کریں گے۔ادھر وزیر داخلہ کے دورے کے پیش نظر پونچھ میں سیکورٹی کے سخت انتظامات کئے گئے ہیں۔