مرگن ٹاپ پر بھاری برفباری ،اننت ناگ – واڑون سڑک بند ، واڑون کے بالائی علاقوں میں درجنوں مال مویشیوں ہلاک

محمد تسکین

سرینگر// ضلع کشتواڑ کے علاقہ مڑواہ ۔ واڑون کو ضلع اننت ناگ سے جوڑنے والی سڑک مرگن ٹاپ کے آر پار برفباری کی وجہ سے بند ہوگئیہے اور ٹریفک کی آمدورفت روک دی گئی ہے۔ واڑون کے بالائی علاقوں میں خانہ بدوش بکروالوں کے مال مویشیوں کے ہلاک ہونے کی بھی خبریں موصول ہوئی ہیں۔
مرگن ٹاپ سطح سمندر سے تقریباً 13 ہزار فٹ کی بلندی پر واقع ہے اور یہ سڑک مڑواہ اور واڑون کی دور افتادہ وادیوں کے ہزاروں لوگوں کیلئے واحد رابط سڑک کی حیثیت رکھتی ہے۔ ہر سال شدید برفباری کی وجہ سے یہ اہم راستہ چار سے پانچ ماہ تک بند رہتا ہے، جس کے نتیجے میں مقامی آبادی کو ناقابل بیان مشکلات کا سامنا کرنا پڑتا ہے اور برفباری کے بعد پورا علاقہ صحت کی سہولیات، تعلیم اور بنیادی ضروریات سے محروم ہو جاتا یے۔
واڑون سے موصولہ اطلاعات کے مطابق بالائی علاقوں میں ایک فٹ سے زائد تازہ برفباری ہوئی ہے اور واڑون کے بالائی علاقوں، خاص کر سکھنائی اور مرگی میں خانہ بدوش کنبوں کے مال مویشیوں کی ہلاکت کی غیر مصدقہ اطلاعات بھی موصول ہوئی ہیں۔
سکھنائی گاؤں واڑون تحصیل کا آخری گاؤں ہے اور وہاں سے محمد امین نے فون پر کشمیر عظمیٰ کو بتایا کہ مقامی لوگوں نے برفباری میں پھنسے متعدد خانہ بدوش خاندانوں کو بچا کر اپنے گھروں میں پناہ دی ہے تاہم شدید برفباری کے باعث مال مویشیوں مویشیوں کے ہلاک ہوئے ہیں ۔ مال مویشیوں کے نقصان کی تاحال سرکاری سطح پر تصدیق نہیں ہو سکی ہے۔اننت ناگ سے مرگن کے درمیان کئی درخت بھی اکھڑ گئے تھے، جنہیں بعد میں مسافروں نے خود ہٹا کر سڑک کو صاف کیا۔