جموں و کشمیر میں آج رات سے پیر صبح تک بھاری برف باری متوقع

سرینگر// محکمہ موسمیات نے جموں و کشمیر کے بیشتر علاقوں میں آج رات سے پیر کی صبح تک برفباری کی پیشگوئی کی ہے، جس کی سب سے زیادہ شدت آج رات میں ہوگی۔
محکمہ موسمیات کے ایک عہدیدار نے بتایا کہ کشمیر اور چناب ویلی کے نشیبی اور بالائی علاقوں میں شدید برفباری کا امکان ہے۔
انہوں نے کہا کہ زیادہ تر علاقوں میں ہلکی سے درمیانی بارش (جموں کے میدانی علاقوں میں) اور برفباری متوقع ہے، جس کے بعد 6 جنوری کی دوپہر سے موسم میں بہتری آئے گی۔
7 سے 10 جنوری تک عمومی طور پر بادل چھائے رہنے اور خشک موسم کا امکان ہے، جبکہ 11 اور 12 جنوری کو چند علاقوں میں ہلکی برفباری متوقع ہے۔ 13 سے 17 جنوری تک عمومی طور پر خشک موسم رہنے کی پیشگوئی کی گئی ہے۔
عہدیدار نے مزید کہا کہ 4 اور 5 جنوری کی رات کے دوران برفباری کے باعث زمینی اور فضائی ٹرانسپورٹ میں عارضی رکاوٹیں پیدا ہو سکتی ہیں۔
انہوں نے سیاحوں، مسافروں اور ٹرانسپورٹروں کو منصوبہ بندی اور ٹریفک ایڈوائزری پر عمل کرنے کا مشورہ دیا ہے۔
دریں اثنا، سرینگر میں کم سے کم درجہ حرارت منفی 1.6 ڈگری سیلسیس ریکارڈ کیا گیا، جو معمول سے 0.8 ڈگری زیادہ ہے۔ قاضی گنڈ میں منفی 6.6 ڈگری، پہلگام میں منفی 2.6 ڈگری، کوکرناگ میں منفی 5.8 ڈگری، اور کپواڑہ میں منفی 2.2 ڈگری درجہ حرارت ریکارڈ کیا گیا۔
جموں میں کم سے کم درجہ حرارت 8.7 ڈگری، بانہال 3.0 ڈگری، بٹوت 6.5 ڈگری، کٹرا 11.2 ڈگری، اور بھدرواہ 3.0 ڈگری رہا۔
وادی کشمیر اس وقت 40 دن کی شدید سردی کے دورانیے “چلہ کلان” کی لپیٹ میں ہے، جو 21 دسمبر سے شروع ہوا ہے۔ اس کے بعد 20 دن کی سردی “چلہ خورد” (30 جنوری سے 19 فروری) اور 10 دن کی “چلہ بچہ” (20 فروری سے یکم مارچ) ہوتی ہے۔