عظمیٰ ویب ڈیسک

سرینگر// وزیر تعلیم سکینہ ایتو نے جمعرات کو کہا کہ سرکاری سکولوں کے طلباء کو سالانہ امتحانات کے فوراً بعد مفت نصابی کتب فراہم کی جائیں گی۔
انہوں نے مزید کہا کہ طلبہ کو کتابیں فراہم کرنے میں کسی قسم کی تاخیر نہیں کی جائے گی۔
نامہ نگاروں سے بات کرتے ہوئے سکینہ ایتو نے کہا، “جب ہم نے نویں جماعت تک کے طلباء کے لیے تعلیمی سیشن تبدیل کیا، تب میں نے متعلقہ حکام کو پہلے ہی ہدایت دی تھی کہ امتحانات کے فوراً بعد نصابی کتب کی فراہمی کو یقینی بنایا جائے”۔
انہوں نے کہا، “جیسے ہی امتحانات مکمل ہوں گے، ہم طلباء کو مفت نصابی کتب تقسیم کرنے کا عمل شروع کریں گے”۔
وزیر تعلیم نے مزید کہا، “میں نے متعلقہ محکمے اور حکام کو یہ بھی ہدایت دی ہے کہ طلبہ کو نصابی کتب کی فراہمی میں کوئی تاخیر نہ ہو تاکہ ان کی تعلیم متاثر نہ ہو”۔
واضح رہے کہ گزشتہ برسوں میں سرکاری سکولوں کے طلباء کا تعلیمی سلسلہ شدید متاثر ہوا ہے کیونکہ ان اداروں میں داخل طلبہ کو نصابی کتب عام طور پر نئے تعلیمی سیشن کے آغاز کے بعد بہت دیر سے فراہم کی جاتی تھیں۔
2023 میں، محکمہ نئے تعلیمی سیشن کے آغاز کے دو ماہ گزرنے کے باوجود مفت نصابی کتب فراہم کرنے میں ناکام رہا۔
اس سے قبل، نصابی کتب کی تقسیم میں تاخیر کی وجہ سے طلبہ کو شدید مشکلات کا سامنا کرنا پڑا تھا کیونکہ محکمہ سکولوں میں کتابیں بروقت فراہم کرنے میں ناکام رہا تھا۔