بھارتی حکومت کا پاکستانی ڈرامے، گانے، فلمیں، پوڈکاسٹس اور دیگر مواد پر پابندی کا اعلان

عظمیٰ ویب ڈیسک
نئی دہلی/بھارت اور پاکستان کے درمیان بڑھتی ہوئی کشیدگی کے درمیان، بھارتی وزارت اطلاعات و نشریات نے جمعرات، 8 مئی کو ایک اہم اقدام اٹھاتے ہوئے تمام او ٹی ٹی پلیٹ فارمز، اسٹریمنگ سروسز اور ڈیجیٹل اداروں کو ہدایت جاری کی ہے کہ وہ پاکستان سے تعلق رکھنے والے تمام مواد کو فوری طور پر بند کریں۔
وزارت کی جانب سے جاری کردہ ایڈوائزری میں کہا گیابھارت میں ہونے والے متعدد دہشت گرد حملوں کے تعلقات پاکستانی ریاستی اور غیر ریاستی عناصر سے ثابت ہو چکے ہیں۔ حال ہی میں 22 اپریل کو پہلگام میں ہونے والے دہشت گرد حملے میں کئی بھارتی شہری، ایک نیپالی شہری جاں بحق ہوئے جبکہ متعدد دیگر زخمی ہوئے۔
ایڈوائزری میں مزید کہا گیا:قومی سلامتی کے مفاد میں تمام او ٹی ٹی پلیٹ فارمز، میڈیا اسٹریمنگ سروسز اور ڈیجیٹل اداروں کو مشورہ دیا جاتا ہے کہ وہ ایسے ویب سیریز، فلمیں، گانے، پوڈکاسٹس اور دیگر اسٹریمنگ میڈیا مواد کو فوراً بند کریں جو پاکستان سے تعلق رکھتے ہوں، چاہے وہ سبسکرپشن کی بنیاد پر دستیاب ہوں یا مفت۔
یہ اقدام جموں و کشمیر کے علاقے پہلگام میں حالیہ دہشت گرد حملے کے بعد کیا گیا ہے جس میں 26 معصوم افراد اپنی جانوں سے ہاتھ دھو بیٹھے۔ اس فیصلے کو بھارت کی جانب سے ایک مضبوط ثقافتی مؤقف کے طور پر دیکھا جا رہا ہے جو دونوں ممالک کے درمیان بگڑتے ہوئے سفارتی تعلقات کی عکاسی کرتا ہے۔
یہ پابندی ان تمام پاکستانی نژاد مواد پر اثرانداز ہوگی جو بھارتی او ٹی ٹی پلیٹ فارمز پر دستیاب تھے، جن میں مقبول ڈرامے، ویب سیریز، موسیقی کے البمز اور آزاد پوڈکاسٹس شامل ہیں۔ اب بھارتی اسٹریمنگ سروسز کو یہ تمام مواد فوری طور پر ہٹانا ہوگا۔
یہ پہلا موقع نہیں جب دونوں ممالک کے درمیان ثقافتی اور تفریحی تبادلے کو جغرافیائی کشیدگی کے باعث روکا گیا ہو۔2016 کے اڑی حملے کے بعد پاکستانی فنکاروں پر بھارتی فلم انڈسٹری میں کام کرنے کی غیر رسمی پابندی عائد کی گئی تھی۔ تاہم، کچھ پاکستانی مواد اب تک ڈیجیٹل پلیٹ فارمز کے ذریعے دستیاب تھا، جو اب اس نئی ہدایت کے بعد بند کیا جا رہا ہے۔تاحال، بڑے او ٹی ٹی پلیٹ فارمز کی جانب سے وزارت کی ہدایت پر کوئی باضابطہ بیان جاری نہیں کیا گیا۔